Тÿнямбалне могай гына урлык пий уке: бульдог, лабрадор, далматин, алабай, дункер… Изи, кугу капан, кÿчык, кужу пунан. Икте – тале сонарзе, весе – сай орол, кумшо – кычалше. Кызыт яллаштат тÿрлӧ пийым ашнат. Теве Оршанке район Кугунур школышто 4-ше классыште тунемше Настя Янгаева шпиц урлык пийым моткоч йӧрата.
– Тыгай пийым кум ияшем годымак интернетыште ужынам. Да эре шоненам: «Ах, могай мотор, изи, весела. Мыйынат тыгай лийже ыле». Ин деш ийым темымекем, вучен шуктенам. Ачам ден авам шочмо кечемлан эн шерге пӧлекым ыштеныт. Тудлан Рада лÿмым пуэнам. «Радость» шомак гыч. А документыште тыге возымо: «Вам на радость Графиня Монро». Тудо 2023 ий 11 августышто шочын, – ойла Настя.
Рада суртышто ила, пырля малаш йӧрата. Уна-влак толыт гын, моткоч куана. Тӧрштылаш тÿҥалеш, кидышке налаш йодеш. Йоча-влакын мом ыштымыштым эскера да нунын семын кояш тырша. Настя почеш фортепиано дене шокта, шке семынже пуйто мура. Ӱстембак сийым поген шындымеке, чыланыштым кочкаш ÿжеш. Тыгак ныжылгылыкым йӧрата.
– Ойыртемалтше урлык пийым ончаш йӧсӧ манын, шукынжо шонат. Пунышт кужу, ошо – эскерыман. Тиде нелылыкым ок лук, тÿҥжӧ – жапыштыже мушкаш, фен дене кошташ да шераш. Радалан шолтымо лудымо шылым, пакчасаскам пукшена. Пырыс деч шуко ок коч. Икманаш, Рада мыланна куаным веле конда, – ойла Настян аваже Надежда Вячеславовна.
Христина АЛЕКСАНДРОВА.
Фотом еш архив гыч налме.
