Марий Эл деч тораште илыше-влак марий улмышт дене утларак кугешнат. Марла кутырымо деч посна марла мурат, куштат, ансамбльым чумырат. Теве Татарстан Республик Менделеевск олаште С.Гассар лӱмеш тӱвыра полатыште «Эрвел» марий муро калык ансамбльын спутник коллективше (снимкыште) пашам ышта. Тудым Татарстан Республикысе тӱвыран сулло пашаеҥже В.К.Сидорова вуйлата.
— Коллективыш 9-14 ияш куд ӱдыр коштеш. Чыланат марий ача-аван икшывышт улыт, манаш лиеш. Кугезыштын тӱвыраштым, йӱлаштым палышт манын, кугыеҥ-шамыч азапланат. Ачаава-влаклан эҥертыш улмыштлан, полышкалымыштлан кугу тау! — ойла Валентина Капитоновна.
Ӱдыр-влак Менделеевск олаште эртаралтше чыла гаяк мероприятийыште мастарлыкыштым ончыктат. Ик эн чолга участник, Настя Петрова, Озаҥ олаште Татарстан Республикын Раисше (Вуйлатыше) Рустам Миннихановлан марий мурым йоҥгалтарен.
Финн-угор калык-шамычын республикысе фестивальыштышт, «Росток» республикысе калык усталык конкурсфестивальыште, йоча фольклор коллектив-шамычын «Звонкая капель» республикысе фестивальыштышт, всероссийский йоча фольклориадыште да ятыр моло вере мастарлыкыштым ончыктеныт да сеҥыше-влак радамыш лектыныт.
— Ме шке кундемысе, кумдан палыме муро-влакым, такмак-шамычым мурена. Ончыкыжым репертуарым пойдараш шонена, — ойла Валентина Сидорова.
Христина АЛЕКСАНДРОВА.
Фотом ансамбльын архивше гыч налме.
