20 сентябрьыште «Россия» телеканалысе «Удивительные люди» шоушто Йошкар-Ола гыч Иван Карасев (снимкыште: шолаште) мастарлыкшым ончыктен. Ваня Йошкар-Оласе 28-ше номеран лицейыште тунемеш. Рвезе Рубикын кубикшым погымаш дене Российыште 100 топыш пура, а Меффертын пирамидкыжым погымаш дене – тӱнямбалсе топ-400 радамыште. 16 ияш веле гынат, тунемшыже-влак улыт. Тудо спидкубинглан (Рубикын кубикшым але вес тӱрлӧ головоломкым писын погымаш) туныкта. Тыгай туныктышо Йошкар-Олаште икте веле.
– Вич ий ончыч лагерьыште лиймем годым вожатыйнан кубикым ик минут жапыште погымыжым єрын онченам. Мӧҥгӧ толмекем, Рубикын кубикшым налынам да тунемаш тӱҥалынам. Кажне кечын тидлан кок-кум шагатым ойырем. Шоушко логалмеке, моткоч тургыжланенам. Эн ончыч моткоч тургыжланенам. Передачыште войзалтме годым чынжымак ойыртемалтше да ӧрыктартарыше еҥ-влак дене палыме лийынам. Кубикым вӱд йымалне погымаш дене тений тӱнямбалсе рекордым шындаш шонем.
