Сылнын сӱретлыме мастарлык моткоч шагал еҥлан пуалтеш. 2-шо номеран Морко школын 9-ше классыштыже тунемше Лена ТИМОФЕЕВАН пашаже-влакым ончетат, профессионал сӱретче сӱретлен, шонет.
– Кок ият пелаш улмыж годымак икымше сӱретше шочын. Икымше урокым коваже эртарен. Тукымыштына сӱретлаш кумылан-влак ятырын улыт, – ойла Ленан аваже Ирина Семёновна.
Лена 1-ше классыште тунеммыж годым Морко посёлкысо «Палитра» школ-студийышке ушнен. 2-шо класс гыч посёлкысо Йоча сымыктыш школын художественный пӧлкашкыже кошташ тӱҥалын. Кӱчык жапыште сеҥымашыже ятыр погынен. Республикысе изосымыктыш тоштерыште эртаралтше «Марий Элын самырык мастарже-влак» ончерышке «Ковам дене ялыште» сӱретшым аклаш луктын. «Куэрла» пашаж дене всероссийский конкурсышто мастарлыкшым терген. «Российын самырык еҥже-влак» республикысе конкурсын «Архитектур да интерьер» таҥасыштыже 2-шо верыш лектын. Тений персональный ончерже Морко посёлкысо М.Н.Янтемир лӱмеш сылнымут да этнографий тоштерыште лийын. Ленан сеҥымашыже-влак – Р.В.Яковлеван паша лектышыже.
Уста ӱдыр ончыч пӱртӱсым сӱретлаш йӧратен гын, кызыт панно-влакым ышта.
– Фоамиранеш чурийым сӱретлем, вара радынаш ӱпым, вургемым урген пижыктем. Тыге сылне айдеме шочеш, – ойла Лена.
Уста ӱдырын лӱмжым профессионал сӱретче-влак радамыште икмыняр ий гыч ужына манын ӱшанем.
