Тыланда, Йӱштӧ кугызай, кумшо серышым возем. Йочасадыш коштмем годымак, киндер сюрпризын пластмассе муно атышкыже сӱретан серышемым да изи пӧлекемым пыштен, у ий кож йымаке шындымемым шарнем. Тиде икымше серышем лийын.
Кокымшо серышемым тӱҥалтыш класслаште тунеммем годым почто конверт дене Великий Устюг олаш возен колтенам. Мыйым ӱшандарен кертше да йомак тӱняшке пуртен моштышо еҥлан кугу таум ойлем. Изи годым кузе Йӱштӧ кугызалан от ӱшане?!
– Молан мый серышым возем? – йодыда.
– Изи годсо жапым шарналтен. Кажне айдемын чоныштыжо юзо йомакысе гай волгыдо куан лийже манын, – вашештем.
Йӱштӧ кугызай, мыланем жапым ойырыметлан кугу тау! У ий йӱдым уналыкеш тол!
Юля УСОВА.
Марий Турек посёлко.
