Юрино посёлкышто верланыше С.А.Лосев лӱмеш школышто «Родничок» лесничествым кум ий ончыч почыныт. Тудым ворандарен колтымаште вуйлатыше Е.В.Домрачеван надырже кугу. Екатерина Владимировна пӱртӱсым аралыме, шымлаш кумылаҥдыме шонымаш дене 3-11-ше класслаште тунемше-влакым ик ешыш чумырен.
– «Мланде йымачын ик гана шолын лекше памаш нигунам йогымым ок чарне», – ойлат калыкыште. Школ лесничествым кузе лӱмдымӧ нерген шонымо годым ты калыкмут ушыш пурен. Тыге мемнан «Родничокна» шочын, – ойла вуйлатыше. – Самырык улына гынат, пашана дене лӱмнернам суленна, шонем. «Родничокыш» тӱрлӧ ийготан йоча-влак ушненыт. Тиддене кугешнем. Тӱҥалтыш класслаште тунемше-шамыч изинек тӱшка дене пашам ышташ тунемыт: пӱртӱсыштӧ арулыкым эскерат, шулдыран йолташ-влаклан кормушкым ямдылат. Кугурак-влак нунылан эҥертыш улыт, тӱҥалме пашаштым чын могырыш тапташ полшат.
Школ лесничествыште йоча-влак пӱртӱсым шымлат, пушеҥгым шындаш тунемыт. Шымлымаш пашам возат, плакатым сӱретлат, буклетым ямдылат, листовкым шаркалат. «Иле, кож», «Пӱртӱсын поянлыкше – мемнан кидыште», «Чодыраште пожар ынже лий» да моло акцийлам эртарен, калыкым шочмо пӱртӱсым аралаш кумылаҥдат. Тӱрлӧ экологий конкурслаш ушнымо дене усталыкыштым вияҥдат. Сеҥымаш копилкыштышт республикысе таҥасымаш гыч 26 чапкагазышт уло, всероссийский гыч – кокыт.
