Семёновко селаште верланыше 21-ше номеран школышто историй тоштер 2008 ий гыч пашам ышта. Тудым Россий Федераций общий образованийын почётан пашаеҥже, кугыжаныш марий йылмым туныктышо О.Н.ВАСЕНИНА вуйлата.
– Оксана Николаевна, историй музейым почаш могай амал лийын?
– Школын выпускникше Рустам Сафинын ӱмыржӧ 1996 ийыште Чечня сарыште кӱрылтын. Тылеч вара кажне ийын школышто Шарнымаш кечым эртарена. Тушко ешыжым, йолташыже-влакым ӱжына. Тунам школышто Рустамлан пӧлеклалтше музей сынан лукым ышташ шонымаш шочын. 1996 ий сентябрьыште республикыште ик эн ончыч кадет классым почынна. 2007 ийыште историй лукым келыштаренна. Рустамын ачаже эргыжын серышыже-влакым, кительжым, тӱрлӧ арверым пуэн. 2008 ийыште лукым тоштерыш савыренна. 2010 ийыште тоштерыште Р.Сафинлан пӧлеклалтше «Тудын подвигше курымашлык» мемориал комплексым почынна.
– Школ тоштерда илышын тӱрлӧ шӧрынжым авалта. Экспозиций-влак могай тематикылан пӧлеклалтше улыт?
– Семёновко кундем гыч Афган сарыште ныл еҥын ӱмыржӧ кӱрылтын. Сандене Афган сарлан пӧлеклалтше стендым ыштенна. Кугу Ачамланде сарын ветеранже, тылыште тыршыше-влаклан посна пӧлка уло. Кадет-влак нерген экспозицийым келыштаренна, фильмым войзенна. Тылеч посна школын историйжым шымлена, «Овощевод» совхоз нерген шымлыме пашам шуктена. Этнокультур йыжыҥымат ӧрдыжеш огына кодо.
– Тӱрлӧ проектым илышыш шыҥдареда да пашада-влак дене тӱрлӧ конкурсышто сеҥышыш лектыда. Лудшына-влакымат палдарыза.
– 2009 ий гыч тоштер экспозиций республиканский конкурсышто таҥасена: ятыр гана икымше лийынна, 2-шо, 3-шо верламат налынна. «Человек на войне» республиканский проект радамыште «Музейная тропа по Семёновскому округу» проектым возенна. Кугу Ачамланде сарын ветеранже-влак дене вашлийын мутланенна, кажныж нерген презентацийым ыштенна. Тачысе кечылан ты кундемыште ик ветеран – Пётр Елисеевич Белик – гына кодын. «Дети войны» альбомым чумырымашке тунемше-влак кумылын ушненыт. 2018 ийыште школысо «Шарнымаш книгам» ямдылаш тӱҥалынна. Йоча-влак сарыште лийше родо-тукымышт нерген уверым погат. Кугурак класслаште тунемше-влак «Уроки Мужества. Мы этой памяти верны» всероссийский проектыш ушненыт. Ты сомылым «Боевое братство» всероссийский организацийын Марий Элысе пӧлкаж дене пырля эртарат. Ӱмаште «Лучший музей, посвящённый увековечению памяти защитников Отечества» всероссийский конкурсын регионысо этапыштыже 3-шо лийынна. Тений Сталинград кредалмашын историйжым шымленна, тушто кредалше землякна-влак, Марий кундемын олам угыч нӧлташ полшымыж нерген пален налынна да экспозицийым келыштаренна. Тудын почеш видеоэкскурсийым эртарена. Тунемше-влакын сеҥымашышт ятыр. Аня Гуляева, Катя Корякова, Таня Богомолова (11-ше класс), Аня Короткова (8-ше класс), Елисей Смирнов (6-шо класс) тоштер пашам виктарымаште ӱшанле полышкалыше улыт.
