Книгагудо – книга тӱняшке корным почшо вер. Эше шукерте огыл еҥ-влак библиотекыш лудаш, книгам налаш коштыныт гын, кызыт тушто уверым писын кычалаш, каналташ, чонлан келшыше пашам муаш, йолташым вашлияш лиеш. Поро шинчаончалтышан книгагудо пашаеҥ-влак лудшо-шамычым эре вучат. К.В.ЛЕБЕДЕВА книгагудым кокымшо пӧртшылан шотла. Тудо У Торъял районысо библиотекын методике да библиографий пӧлкажым вуйлата.
– У Торъял районысо библиотеке республикыште икымше модельный книгагудылан шотлалтеш. Ксения Владимировна, тудо тыглай деч мо дене ойыртемалтеш?
– 2020 ийыште «Культура» нацпроект почеш книгагудым модельныйыш савырыме. Тудым кызытсе саманлан келыштарыме: у технологийым кучылтын, у технике дене пашам ыштена. Книгагудышто мультимедийный оборудований, электрон да интерактивный книга-влак улыт. Интер-нетлан кӧра пашам ышташ йӧнан. Лудшо-влаклан библиотеке дене кылым кучаш куштылгырак лийын. Книгагудын фондшо ешаралтын. Йоча да самырык-влаклан 5000 наре у книгам налме.
– Тугеже йоча-влак дене у йӧным кучылтын пашам ыштеда?
– Ме илыш дене тӧр каяш тыршена. Тӱрлӧ направлений почеш пашам ыштыме дене пырля йоча-влакым книгам лудаш кумылаҥдена. Книгагудышто тӱрлӧ клуб пашам ышта. Тений «ИнтелАктив» модмо клубым почынна. Тыште йоча-влак шахмат, шашке, домино дене модыт. Монополий, мафий да моло модышла дене палыме лийыт. Тыге уш-акылым пойдарат. Самырык-влаклан «Юные блогеры» клуб келша. Йыргешке ӱстел йыр шинчын, палыме блогер-влак дене вашлийын кутыраш ӱдыр-рвезе-влак утларак йӧратат. Мемнан дене Эльвира Куклина, Михаил Винокуров, Александр Акилбаев (снимкыште) да моло уна лийыныт. Тунемше-влак квест, квиз модмашыш уло кумылын ушнат.
– Тӱрлӧ конкурсым эртареда, очыни?
– Оҥай ончерым чӱчкыдын келыштарена. Тӱрлӧ темылан класс шагатым, викториным, шарнымаш, патырлык уроклам эртарена. У Торъял школышто тунемше-влак дене кылна пеҥгыде. Книга але посна произведений нерген презентацийым ямдылена. Тудым ончен, йоча-шамычын книгам лудаш кумылышт утларак лектеш. «Даниловские чтения» конкурс йӱлаш пурен. Тений тудо онлайн лийын гынат, марий сылнымутым да поэт-фронтовик Борис Даниловын усталыкшым йӧратыше йоча-влак деч шуко видео пурен. Борис Гри-горьевичын икымше почеламутшо «Ямде лий» газетыште 1937 ийыште печатлалтын. Тидын нерген йоча-влаклан кажне гана ушештарем. «Книгодвижение» акцийыш ятыр йоча ушнен. Тидлан 1 март гыч 27 май марте шуко книгам лудаш кӱлын. Тӱҥ пӧлек велосипед лийын. Сеҥышыш Лола Градова лектын.
– Самырык ӱдыр-рвезе-влак могай книгам утларак лудыт?
– Сылнымутан произведенийлам Интернетыште муаш лиеш гынат, книгам лаштыклаш йӧратыше-влакын чотышт шагалемын огыл. Фантастике, приключений сынаным утларак ойырат. Изирак-шамыч йомакым йӧратат. Книгагудышто тӱрлӧ газет, журнал уло. «Ямде лий» газетым, «Кече» журналым шергалыт.
