Немда школын 3-шо классыштыже тунемше-влаклан астрономий дене «Космический зоопарк» всероссийский урок лие. Йоча-влак деч урок нерген йодыштым.
– Диана, урокышто мом ум пален нальыч?
– Сандалыкыш изи карме-влак (дрозофил) эн ончыч чоҥештеныт.
– Дима, пий-влакым сандалыкыш чоҥешташ кузе ямдыленыт?
– Пий-влакым ойыреныт. Нунылан скафандрым чиктеныт, центрифугышто пӧрдыктеныт. Дезик ден Цыган сандалыкыш чоҥештыше икымше пий-влаклан шотлалтыт. Нунын чоҥештылме жапышт – 20 минут.
Мутланымашке Трофим ушныш:
– Нунын деч вара Лайка лӱман пий чоҥештен. Тудо Мланде йыр 4 гана савырнен. Москваште Лайкалан чапкӱм шогалтыме.
– Ирина, сандалыкыште эше мо лийын?
– Белка ден Стрелка пий-влак лийыныт. Нунын дене пырля 40 колям, 2 куголям, кроликым, икмыняр кушкылым колтеныт. Нуно сандалыкыште 27 шагат чоҥештылыныт.
– Назар, мом шарнен кодыч?
– Сандалыкыште эше Звёздочка лӱман пий лийын. Пу гыч ыштыме айдемым – Иван Ивановичым – тудын пелен колтеныт. Звёздочкаланат чапкӱм шогалтыме.
Йоча-влаклан урок келшен. Шуко ум пален налыныт, шинчымашыштым пойдареныт.
Настя КУЗНЕЦОВА мутланен.
У Торъял район.
