Кугу Ачамланде сар годым чыланат Сеҥымаш кечым лишемдаш полшеныт. Марий Турек район Кугу Нольо ялысе калыкат ӧрдыжеш кодын огыл. Кокам Ксения Петровна Чайникова-Камаева, курсым тунем пытарен, трактор руль воктеке шинчын. Сар пытымеш «Вторая пятилетка» колхозышто пашам ыштен. Кокамын Ирина ӱдыржын каласкалымыж почеш, трактор кабине деч посна, кӱртньӧ шинчыме веран, кугу кӱртньӧ ораван лийын. Кеч йӱр, кеч лум йымалне пашам ышташ кӱлын. Ксения Петровна чыла чытен, тушманым сеҥыме нерген уверым пасушто вашлийын.
Сар деч вара имньым, сӧснам ончен, поварат лийын. Кокам ятыр медаль дене палемдалтын. Марий Турек районын тылысе труженикше-влаклан пӧлеклалтше «Они ковали Победу» книгашке тудын лӱмжым пуртымо.
Даша АЛЕКСЕЕВА.
Волжский, Пӧтъял.
Фотом еш архив гыч налме.
