«Мыняр ияш йочалан сар нерген каласкалаш тӱҥалаш лиеш?» йодышлан психолог, психологий шанче кандидат, доцент Т.Н.ГОЛОВАНОВА (снимкыште) вашмутым пуа:
– Йоча-влак тӱрлӧ улыт. Иктышт кум ияшак сар нерген йодышташ тӱҥалыт, а весышт вич ияш лиймекыштат огыт йодышт. Йочан психикыжым эмгаташ огыл манын, койыш-шоктышыжым шотыш налман. Сар нерген каласкалыме годым сӱретым кучылташ темлена. Герой-влакым палышт манын, легендым, мифым, эпосым пырля лудаш оҥай. Кеч-могай сар – чонышто сусыр пале. Тиде сусыр тукым гыч тукымыш куснышаш огыл, тудо эмлалтшаш.
Вич ияш икшыват изирак ийготан-влакым кугыеҥ деч арален мошта. Авашт але ачашт кугу йўкын кутыраш тӱҥалыт гын, рвезе-влак нуным арален налаш вашкат. Йоча конфликтым изинек шижын мошта. Мультфильмаште, йомаклаште ужеш. Тыгай примерым кучылтын, еҥ-влакын молан кредалаш тӱҥалмыштым умылтараш лиеш. Кугурак ийготан икшыве-влаклан сарыште кредалше кугезе кочаштым пример шотеш кондаш лиеш. Тыглай каласкалымаш гоч ешын, элын историйже тукым гыч тукымыш кусна.
