Школышто тунемше тӱрлӧ ийготан ӱдыр-рвезе-влакым «Сарын кышаже – тукымемын пӱрымашыштыже» шымлыме паша конкурсышко ушнаш ӱжына. Пашам шкет, класс, еш дене ышташ лиеш.
Кугу Ачамланде сарыште тыныслыкым аралыше кугезе коча-ковада, родо-тукымда нерген уверым тӱрыс да раш паледа? Уке гын, шымлыме пашалан пижса. Сар корныжым радамлыза, могай медаль да орден дене палемдалтмыжым рашемдыза. Ала фронт гыч возымо серышыже, иктаж ӱжгарже еш реликвий семын аралалтыт – нунымат палемдыза. Паша-влакым 22 июнь марте вучена. Сеҥыше-влаклан пӧлек лиеш.
