Кугу Ачамланде сар кажне еҥын чонышкыжо шем кышам коден. Ковам Клавдия Петровна Янгелова 92 ияш. Тудо сар годсо илышым сайын шарна. Йодыштмем годым шинчавӱдшым ӱштыльӧ да шарналтен-шарналтен ойлаш тӱҥале: «Война тӱҥалме годым мый 14 ияш лийынам. Ачамын сарыш кузе кайымыже шинча ончылнем тачат коеш. Черле ыле, тоям тоялен, пӧрт гыч лекте. Мый кугурак икшыве лийынам, авай – эре пашаште. Ачам авайлан полшаш да шольо-шӱжарым ончаш ойлен кодыш. Тылеч вара ачамым ужаш пӱралтын огыл улмаш. Сар годым ялыште илалше-влак, ӱдырамаш да йоча-шамыч веле кодынна. Шуко паша логалын. Мый фермыште тыршенам, изинек имне дене коштынам. Кастене салтак-влаклан фронтыш колташ носким, пижым пидме». Ковам шуко каласкалыш. Мый, тудым чаманен, шып колышт шинчышым.
Настя ИВАНОВА.
Морко, Коркатово.
