Шукерте огыл эртаралтше «Марий Эл Республикын воспитательже» республикысе конкурсышто сеҥышыш Звенигово районысо «Светлячок» йочасадын туныктышо-дефектологшо Т.В.Александрова (снимкыште) лектын. Сеҥымашке корно кузе шуйнен, пален налаш манын, мутланаш шонен пыштышым.
– Татьяна Вячеславовна, воспитатель лияш шонымаш кузе шочын?
– Изиэм годымак акам дене коктын школла модынна. Вашла туныктенна, отметкым шынденна. Школым тунем пытарымеке, шуко шоныде, Марий кугыжаныш университетыш руш йылмым да литературым туныктышылан тунемаш пуренам. Пытартыш курслаште шинчымашым погымо годым логопед, дефектолог лияш шонымаш шочын. Ешартыш шинчымашым налынам. Чонем изи ньога-влак деке ӱжын. Ынде луымшо ий йочасадыште пашам ыштем.
– Йочасадыште паша мо дене оҥай?
– Воспитатель нигунам ик верыште ок шинче. Тудо сӱретче, дизайнер, актёр, мурызо, оратор. Мый ойыртемалтше йоча-влак дене пашам ыштем. Нуно мыйын полшымем дене икымше шомакым ойлаш тӱҥалыт. Тиде мыланем моткоч шерге. Ӱдыр-рвезе-влакын йӧратымашышт, йӱлышӧ шинча дене ӱмбакем ончымышт пашам ышташ кумылым луктыт.
– Конкурсышто могай пашам араленда?
– Конкурсыш тений кокымшо гана ушненам. Икымше гана конкурсын паша радамже, йодмашыже, участникше-влак дене палыме лийынам гын, тений сеҥашак шонен каенам. Мый пашаштем «7 граней кубика» проектым кучылтам. Конкурсышто тиде проект да икмыняр модыш дене палдаренам. Иктешлымаш годым лӱмем колмеке, тургыжланымашым, куаным шижынам. Мемнан республикын чапшым всероссийский конкурсышто аралаш йӱдшӧ-кечыже ямдылалташ тӱҥалам.
