Сеҥымаш дене – ончыко

Настя Кошпаева Кужэҥер район Токтайбеляк школын 8-ше классыштыже тунемеш. Тренер А.Е.Ельмикеевын вуйлатыме карате секцийыш коштеш.

– Карате капкылым пеҥгыдемда, виян да лӱддымӧ лияш туныкта. Йоча дисциплинылан тунемеш,  шонымашкыже шуаш тырша. Мый спортын ты видше дене кандашымше ий кылым кучем. Арнялан кум гана тренировкыш коштам. Тыгак мӧҥгыштӧ кок-кум шагатым ойырем. Александр Егоровичын моштен тренироватлымыжлан кӧра ятыр сеҥымашыш шуынам. Тудлан кугу таум ойлем, – ойла Настя.

Самырык спортсменке республикысе таҥасымашлаште эре сеҥышыш лектеш. Всероссийский таҥасымашке кок гана ушнен. Кок ганажат лу эн сай спортсмен радамыш логалын. Звенигово районын да Йошкар-Олан первенс-твылаште 1-ше верым налын. Марий Эл Республикын кубокшо верч таҥасымаште икымше лийын. Настя сеҥымаш дене ончыко кая.