Илыш ончыко кайыме дене туныктымо пашаштат вашталтыш пура. Тачысе туныктышылан тӱрлӧ йӧным кучылтын моштышо, чыла могырым шуаралтше (универсальный) лийман. Тудо йочалан йолташ, полышкалыше, тыгодымак мурызо але артист. Туныктышо чоным почын пашам ыштышаш, тӱрлӧ йӧным кычалшаш, шкеже тунемшаш, ончыко кайышаш да почешыже йоча-влакым вӱдышаш. Тудын шокшо помышыштыжо кажне йоча умылымашым, ласкалыкым мушаш. Лач тыгай Марий Турек районысо Сысоево школышто марий кугыжаныш йылмым туныктышо Э.Л.Смоленцева. Уста туныктышо 27 ий йоча-влакым шочмо йылмым ава семын йӧраташ, пагалаш да келгынрак тунемаш кумылаҥда.
– Эльвира Леонидовна, кызыт чӱчкыдын шуко йоча рушаҥын манмым колына. Тидын шотышто нелылыкым шижыда?
– Ешыште ача-ава йоча дене марла кутыра гын, тудо шке шочмо йылмыжым нигунам ок мондо. Рушаҥме шотышто ача-ава-влакынат титакышт уло. Чаманен каласем, мемнан школыштат шуко йоча рушла кутыра, но мый урокышто тӱрлӧ йӧным кучылтын, марий йылмым йӧраташ кумылаҥдем. Урок арняште ик-кок гана веле гынат, чыла ыштен шукташ тыршена. Марий книга-влакым, газетлам шергалына. Поэт-влакын почеламутыштым лончылена, тунемына. Пайрем йӱлам, марий модышым шымлена. Кажне классыште марла чын, раш кутырышо кум-ныл йоча уло. Нунын дене пашам ышташ куштылго, моло йоча ончен кумылаҥыт. Кандашымше класс гыч Карина Тихонина ден Саша Орловам поснак палемден кодымо шуэш.
– Тунемшыда-влакым тӱрлӧ конкурсышто чӱчкыдын ужаш лиеш.
– Конкурс нерген пален налмеке, йоча-влакын кумылышт нӧлтеш.
Районышто марла эртаралтше кажне гаяк мероприятийыш ушнена. Республикыштат школнан чапшым аралена. Марий тӱвыра рӱдерын эртарыме «У ий саламлымаш» республикысе конкурсышто Ефросинья Якимова да 6-шо классыште тунемше-влак сеҥыше радамыш логалыныт. Шукерте огыл Аня Орлова марий кугыжаныш йылме дене республикысе олимпиадыште уш-акылжым терген.
Ялысе клуб дене кылна пеҥгыде. Уста ӱдыр-рвезе-влакым марла мураш туныктем. Муро фестивальлашкат чӱчкыдын ушнена. Мый ава семын кажне йочан сеҥымашыжлан куанем. Пырля ыштыме паша эре шерге. Тудо ончыкыжымат тыршаш вийым пуа.
