Оршанке район гыч Рыбаковмыт еш (снимкыште) Марий Элын чапшым «Успешная семья Приволжья» конкурсышто аралаш тўҥалеш. Кок але утларак икшывым ончен куштышо еш-влакын таҥасымашышт 7-8 июльышто Чебоксарыште эртаралтеш. Тушко Юл кундем федерал округ гыч 14 еш ушна.
Рыбаковмытын сурт озанлыкышт кугу, чыве, каза, кролик-влакым ашнат. Тыгодымак яра жапыштым пайдалын эртарат: походыш коштыт, колым кучаш, велосипед дене кудалышташ, телым ече дене мунчалташ йӧратат, мураш-кушташ кумылан улыт. Рыбаковмыт ешлан сеҥымашым тыланена.
