Вилена ГОРДЕЕВА дене «Кеҥеж сылнымутчо-2021» литератур семинарыште палыме лийынна. Тудо Параньга район Матародо школын 9-ше классшым тунем пытарен. Марий сылнымутым йӧратымыже марий литератур дене районысо олимпиадыште сеҥымашым конден.
– Олимпиадылан ямдылалтме годым шуко лудынам, лончыленам. Туныктышем Нина Алексеевна Семёновалан кугу таум ойлем. Мыланем Сергей Чавайнын, Яков Майоров-Шкетанын, Олык Ипайын сылнымутлашт келшат. Ты марте изирак жанран произведений-влакым лудынам гын, ончыкыжым роман-шамыч дене палыме лияш шонем. Мыланем поэзий лишыл. Акам Вера Гордеева – поэтессе. Тудат мыйым шӱмаҥда. Семинар деч вара почеламутым шке гыч возаш кумыл шочо, – ойла Вилена.
