Марий Турек районышто Совет Ушем Герой Сергей Суворов нерген марий фильмым войзат. Паша кузе кайыме нерген Марий Турек районысо В.П.Мосолов лӱмеш краевед музейыште туризм паша шотышто специалист, «Славный сын земли марийской» проектын авторжо О.Э.ЕГОРОВА дене кутырышна:
– Мемнан проектнам, «2013-2020 ийлалан Марий Эл Республикыште кугыжаныш национал политике» программе дене келшышын, Марий Эл Республикын тўвыра, печать да калык-влакын пашашт шотышто министерстве сайлан шотлен. Фильмым войзаш уста фотограф, видеограф, Марий Эл Республикысе тўвыран сулло пашаеҥже Иван Иванович Герасимов толын. Тудо Марий Турек районын илышыже нерген ятыр фильмым сниматлен. Ме кўчык жапыште проектым возенна да тудым илышыш шыҥдараш окса полышым налынна. Сценарийым возымо годым Сергей Суворов нерген ятыр книгам лудаш пернен.
Фильмыште действий геройын шочмо Кугу Вочарма ялыштыже да Калуга кундемыште (тудо тушто кредалын) кая. 1941 ий 22 июньышто, Косолоп ялыште ярмиҥга эртыме кечын, Кугу Ачамланде сар тӱҥалме нерген увер шарла. Тӱҥ герой-влак – Сергей да тудын йӧратыме ӱдыржӧ Качуш. Качуш келшыме рвезыжым сарыш ужата. Фильмыште тыгак Сергейын эмганымыже ончыкталтеш. Икмыняр шонымашым Дим.Орайын «Чолга шӱдыр» повестьше гыч налме.
Сергейын рольжым Советский район Ургаш лицейын 9-ше классыштыже тунемше (тылеч ончыч Марий Турек кыдалаш школышто тунемын) Дима Бабайкин модын, Качушын образшым Торгово-технологический колледжын 2-шо курсышкыжо вончышо Кристина Волкова чоҥен. Тыгак фильмыште «Савак кундем» калык фольклор ансамбльын артистше-влак войзалтыныт.
– Совет Ушем Геройын рольжым модаш мыланем кугу чап лийын. Садлан мый ятыр жап ямдылалтынам. Фильмыште модмем Сергей Суворов гай патыр, лӱддымӧ лияш таратен, – ойла Дмитрий.
Фильмын тӱҥ шонымашыже – шочмо кундем верч вуйым 19 ияшак пыштыше, марий калыкын, Киндлат тукымын патыр эргыже нерген шарнымашым курым мучкылан арален кодаш.
