Марий поэт, Россий писатель ушемын еҥже, Марий Эл Республикын сулло туныктышыжо, Шернур район Кожласола ялын ӱдыржӧ Зинаида Васильевна Ермаковам (снимкыште) республикыште шукын палат. Тудо кугыеҥ ден йоча-влаклан ятыр почеламут сборникым пӧлеклен. З.Ермакован шочмыжлан 28 сентябрьыште 80 ий темеш. Чапле лӱмгече вашеш поэт дене чон почын мутланышна.
– Зинаида Васильевна, Те поэзий жанрыште кыртмен пашам ыштен да, кызытат тыршеда, шонем. Почеламут чондам мо дене сымыстарен?
– Кызыт у почеламут-влак огыт шоч, изиш «йогыланем». Чодырашке, эҥер воктеке коштам. Иктаж-мом коклан гына сералтем. Мый почеламутым изинек лудаш йӧратенам. Ятыр руш, марий автор-шамычым шергалынам. Марисола школышто 8-ше классыште тунеммем годым Миклай Казаков дене вашлиймаш чонеш келге кышам коден. Сцене гыч почеламутым лудмыжым ӧрын колыштынам, мотор марий тувыржым онченам. Мӧҥгӧ мийымеке, тыге шоналтенам: «А мо? Нуно возат гын, ала мыят кертам?» Тыге пӧртна воктене шогышо писте, кок куэ нерген йӱдвошт возенам.
– Кажне еҥ почеламутым серен ок керт. Тудым шочыкташ кугу кумыл але возаш тӱҥалше йочалан туныктышын эҥертышыжат кӱлеш.
– Моткоч чын шонымаш. Тунемшылан туныктышын эҥертышыже чот кӱлеш. Почеламутым возымашын шке техникыже уло. Шуко йоча мутым шындыл кая, а чын серен ок мошто. Мыйым 9-10-шо класслаште марий йылме ден литератур уроклам серызе Анатолий Павлович Березин туныктен. Тудо сылнымут кружокым почын. Тушко мыят коштынам. Сай шинчымашым налынам да эҥертышым шижынам.
– Теат ятыр еҥлан сылнымутыш корным почында. Тачысе кечын тунемшыда-влак дене кугешнеда?
– Мый ятырышт дене кугешнем. Марий Элын калык писательже Зоя Дудинам, серызе, прозаик, Марий Эл Республикысе тӱвыран сулло пашаеҥже Юрий Соловьёвым, поэт, кусарыше, тыгак Марий Эл Республикысе тӱвыран сулло пашаеҥже Светлана Григорьевам (Архипова) поснак палемдыме шуэш. Тылеч посна шанчыеҥ, спорт мастер тунемшем-шамыч дене моткоч кугешнем.
– Те йоча-влаклан ятыр почеламутым пӧлекленда. Нунылан возаш койыш-шоктышыштым палыман, нунын семын шонкалыман. Тыланда туныктышылан ятыр ий пашам ыштымыда чот полшен, очыни.
– Пеш чот полшен. Икшывылан возаш эн чот йӧсӧ. Йоча дене йоча лийын моштыман. Тудо иктаж мутетым огеш умыло гын, тетла лудмымат кудалта. Йочалан пеш эскерен возыман.
– Жапше годым пырысда-влак ятыр почеламутын геройышт лийыныт. Икмыняр пырысым ашнеда ыле, кызытат чондам куандарат?
– Мыйын кызытат кок пырысем уло: Моисей ден Муся. Коктынат шеме-шеме, кужу пунан, пешак мотор улыт. Ончылнем шинчаш моткоч йӧратат. Чынжымак, пырысем-влак почеламутемын геройышт лийыныт. Марусь пырысем чояк ыле. Холодильникым почеш да эн тамлыжым шкаланже луктеш. «Чоя Марусь» лӱман почеламут сборникемат уло.
– Возаш тӱҥалше-влаклан могай ой-каҥашым пуэда?
– Шуко лудман. Мый шке жапыштыже лудаш чот йӧратенам. Семён Николаевым, Альбертина Ивановам эн чот куанен лудынам. Семён Вишневскийын «Пиал» поэмыжым йоча-влак ончылно эсогыл наизусть каласкалем ыле.
– Зинаида Васильевна, шушаш лӱмгечыда дене шокшын салам лена! Пеҥгыде тазалыкым, кужу ӱмырым, чон ласкалыкым, вуй ӱмбалне яндар кавам, илыш куаным тыланена!
– Тау!
Христина АЛЕКСАНДРОВА мутланен.
Авторын фотожо.
