«Кӧ калык йӱлам пагала да акла, тудо шочмо йылмын ямжым келгын шижеш», – тыге ойлат Морко район Шордӱр тӱвыра пӧрт пеленысе «Эр ӱжара» фольклор ансамбльыш коштшо ӱдыр-рвезе-влак.
Ансамбльыш 15-18 йоча ушнен. Нуно калыкым муро, куштымаш дене веле огыл, тыгак калык йӱлам ончыктымо сценке-влак дене куандарат. Репертуарыштышт «Ятас кучымаш», «Шӱкшак сӱан», «Имне пукшымаште» да молат улыт.
– Йӱла-влакым илыш гыч налына. Утларак пален налаш книгам шергалына, шоҥгыеҥ-шамыч деч йодыштына, – ойлат самырык артист-влак. – Мутлан, ожно имньым самырык-влак йӱдым вӱд воктене кӱтеныт. Сандене вӱд дене кылдалтше шуко историй, йомак улыт. Имньым кӱтымӧ йӱлам ятыр гана ончыктенна. Оршанке посёлкышто эртаралтше «Кугезе вож» фестивальыште сеҥыше радамыш лектынна.
Ансамбль вуйлатыше Владимир Васильевич Кудряшов калык йӱла дене кылдалтше историй-влакым шуко кычалын, шымлен. «Шӱкшак сӱан» нерген мыланемат каласкалыш: «Ожно шӱкшудым мурен ужатеныт. Пакчаште куштырам эрыктымеке, иктыш чумырен, орвашке оптеныт. Тушко йоча-влакым кӱзыктен шынденыт да, коремыш миен шумешке сӱан мурым муреныт. Тор дене кидым рӱзен чеверласеныт. Тыге ыштыме деч вара шӱкшудо шагал шочын, маныт».
Е ИВАНОВА.
