Морко район Нылкудо ялыште илыше Анатолий Николаевич ден София Григорьевна Кузнецовмытым ял калык пагала. Поро кумылан вате-марий ынде кумло вич ий ваш келшен илат. Нуно индеш икшывым ончен куштеныт: шымытшым ашнаш налыныт. София Григорьевна тулык да ача-ава деч посна кушшо йоча-влаклан Морко район Октябрьский интернат-школышто руш йылмым да литературым туныкта. Анатолий Николаевич тазалыкше начарлан кӧра сурт коклаште сомылым тӧрлата.
– Мый шкежат шуко шочшан ешыште шочынам. Йоча жапем Марий Турек районысо Косолап селасе интернатыште эртен. Сандене ача-ава деч посна кушшо икшыве-влакын чоныштышт могай шижмаш озаланымым сайын палем, – ойла София Григорьевна. – Уло чоным икшывылан пӧлеклаш тыршен, кеч икмыняр йочам пиаланым ышташ шонен, ешышке налынна. Эн ончыч кок икшывым, Катя ден Сашам, каныш кечылан мӧҥгӧ конденна. Нуно еш илышым пален кушкыныт. 2014 ийыште ныл йочам, 2018 ийыште кумытым чыла документым ыштен ашнаш налынна.
Кызыт Кузнецовмыт пелен кок эрге ила. Изинек эмганен кушшо Данил – Анатолий Николаевичын полышкалышыже. Ачаж дене пырля чыла пӧръеҥ пашам ышта. Денисат вараш ок код. Тудо Октябрьский школын 8-ше классыштыже тунемеш. Тӱрлӧ мероприятийыш ушна. Эртыше ийын Денисым ачаже мотоблок дене кудалышташ туныктен. «Ынде кеҥежым вольыклан шудым шке шупшыктен кертам», – шыргыжеш Денис. Ялыште паша ситышын. Кузнецовмыт ушкалым, презым, лудым, комбым ашнат. Мӱкш омарташт ятыр уло.
Кугурак икшыве-шамыч ешым чумыреныт гынат, каныш кечылан, пайремлан ача-ава суртыш погынат. Эн вучымо да йӧратыме пайремышт – Кугече. София ден Анатолий Кузнецовмыт икшывыштым Шорыкйол, Ӱярня, Семык да моло марий пайрем йӱла-влак дене палдарат.
– Ӱстел тич чесым поген, Юмылан пелештыме мутым ме огыл гын, кӧ туныкта? Нунат, илен-толын, шке ешыштышт йӱлам шуктен илаш тӱҥалыт манын ӱшанем, – ойла суртоза.
Кузнецовмыт ешыште порылык шӱлыш озалана. Нуно кажне йочам шке икшывышт семын йӧратат. Кажне деке корным муын моштат, йолташ лияш тыршат. Ту-неммаште полшат, пашалан туныктат. Ача-авам ончен, йоча-влак еҥым пагалыше кушкыт. Тидыже Анатолий Николаевич ден София Григорьевналан эн кугу пиал.
– Ача-ава деч посна куш-шо, тулык ӱдыр-рвезе-влак дене 27 ий пашам ыштымеке, кажныже шкемынла чучеш. Но интернатыште илыше кажне йочан ача-аважым алмаштен огына керт, чаманаш веле кодеш, – ойла София Григорьевна.
Снимкыште: София Григорьевна – Алексей, Денис, Данил эргыже-влак дене пырля.
