Кидпаша кумылым нӧлта, кандара, кӧн гын йӧратыме пашашкыже савырна. Йошкар-Олаште илыше С.А.Иванова – кок икшыван ава. Тудо яра жапыштыже крючок дене модышым-влакым пидеш. Мастар кидыштыже маска, пире, рывыж, ур, мераҥ, тӱрлӧ курчак-влак «ылыжыт». Утларакше йоча-влаклан пӧлек олмеш пидеш, пытартыш жапыште йодмо почешат пашам ышта.
– Светлана Альбертовна, кидпашалан изинек шӱман улыда, очыни, сандене тендан кидыште крючок «юзыш» савырна.
– Ковам, кугезе ковамат кидпашалан мастар лийыныт. Кажныже урген, тӱрлен, пидын моштен. Тӱрлымӧ ӱстембалшовыч, лапчык-влак гыч ургымо одеял, куымо шартыш пӧртыштӧ ямым пуртеныт. Витле ий утла аралалтше ӱзгарышт мылам эн шерге улыт. Ожнысо шергакан ыштыш-влакым ончен, мыйынат ыштен ончымем шуын. Кызыт кидпаша деч посна ик кечымат ом эртаре.
– Молан лач модышым ойыренда?
– Ӱдыремын шочмо кечыжлан йолташем пидме модышым пӧлеклен. Яналан моткоч келшен. Крючок дене пидме техникым изиш паленам, сандене шке пидын онченам. Шӱртӧ-влак могай улмыштым, могай шӱртӧ гыч модыш пушкыдырак лиеш – келгынрак пален налаш тыршенам. Икымше гана курчакым пидынам. Вара ӱдырем «Ми-ми-мишки» мультфильм гыч Рывыжым йодын. Эргымлан Маскам пидынам. Тыге икте почеш вес модыш-влак йоча-шамычын модышпєртышкышт «илаш» кусненыт. Интернет полшымо дене йодшо-влак ешаралтыныт.
– Персонаж-влакым кушеч налыда?
– Модышым пидаш тӱҥалме деч ончыч могай тудо лийшашым вуйыштем сӱретлем. Тидын годым фантазий сайын пашам ыштышаш. Тӱсым ойырем, южгугам интернетыште модель-влакым ончем. Ик вере тувыр келша, вес вере йолчием, кумшо вере вуйчием сӧралын коеш. Кажне модышым чоным пыштен пидам. «Копилкыштем» мультфильм, йомак гыч персонаж-влак ятыр погыненыт.
– Те тыгак парняш чиен курчак театрла модаш йӧршӧ курчак-влакым пидыда.
– Кидпашалан мыйым ӱдырем ден эргым кумылаҥдат. Нуно йомакым моткоч йӧратат. Тӱрлӧ персонаж-влакым пидмеке, «Маша да Маска», «Ӱяча» йомак-влакым эн ончыч шке модын ончыктенам, вара Яна ден Егорлан темленам. Нунылан моткоч келшен. Тыге мӧҥгыштына курчак театрым почынна. Тидыже йоча-влаклан шке гыч йомакым шонен модаш моткоч пайдале.
– Пашада ушныжо, кидда лывырге лийже.
Е.ИВАНОВА мутланен.
