Параньга район Кугу Пумарий школышто юзо пӧлем уло. Тушто тӱрлӧ чия, салфетке, меж, шӱртӧ полшымо дене сӱрет-влак «шочыт». Тӱрлӧ йӧным кучылтын сӱретлаш, Римма Валентиновна Калугина туныкта.
– Эн ончыч «Самырык сӱретче» кружокышто пашам тӱҥалынна. Акварель чиям, гуашьым кучылтын, сылне сӱретым сӱретленна. Варарак салфетке дене сӧрастараш тунемынна, – ойла Римма Валентиновна. – Интернетыште шӱртӧ гыч ыштыме сӱретым ужмеке, ты технике дене лишкырак палыме лияш кумылаҥынам. Ончыч шке ыштен онченам, вара йоча-шамычым туныктенам. Кызыт кружок «Мемнан киднан фантазийже» маналтеш. Тушко тӱҥалтыш класслаште тунемше кажне гаяк икшыве коштеш. Кугурак классласе ӱдыр-рвезе-влак жап да чон йодмо семын толыт.
Йоча-шамыч ончыч келшыше сӱретым ойырат, картоныш сӱретлат. Вара тӱрлӧ тӱсан шӱртым пӱчкедат да, титан клей дене клеитлен, сӱретым сӧрастарат. «Тидлан усталык да жап кӱлыт, очыни?» – йодым.
– Усталык огыл, кумыл кӱлеш манам гын, чынрак лиеш. Сӱретым ышташ неле огыл, чытыш да кумыл улыт гын, кажне еҥ шочыктен кертеш. Гуашь дене сӱретлыме годым йоҥылыш ыштет гын, ӱштылаш сайжак огыл, а шӱртым оптен ончымеке, огеш келше гын, кораҥдаш лиеш, – умылтара туныктышо.
Кружокыш коштшо ӱдыр-рвезе-влак шкет, тӱшкан пашам ыштат. Пырля ыштыме кугу сӱрет-влак посна шергакан улыт. Тыгайым ыштыме годым кажне йоча мутым куча. Икте-весым ончен, ой-каҥашым шотыш налын, пашан лектышыже сайрак лиеш.
