Ачам Игорь Григорьевич – уста, пагалыме да йӧратыме суртоза. Тудо шӧртньӧ кидан, кеч-могай сомылым ыштен мошта. Мыйымат пеленже туныкта. «Ончыкылык илышыште кӱлеш лиеш, пӧръеҥ пашалан изинек шӱмаҥман», – ойла ачам. Школ гыч толмеке, яра жапем ачам пелен эртарем. 16 октябрьыште Ачан кечыжым палемдаш тӱҥалына. Ачамым шокшын саламлем да тазалыкым тыланем.
Марк БЕДЕРОВ.
Татарстан, Агрыз, Кадрек.
Родо-тукым дек унала мийымем годым бассейныштышт ала-мо ужарге койылалтмым ужым. Эн ончыч шудо пырче манын шоналтышым, вара шудышырчыкым ушештарыш. Туп дене кия ыле. Лукна – богомол улмаш (снимкыште). Ӱстембаке пыштышна.…
«Нацийын кроссшо» таҥасымашын районысо йыжыҥже Моркышто шукерте огыл эртаралтын. Тушко шукын уш неныт, Арын школ гыч икмынярын лийынна. Кече мотор шоген. Леве мардеж куржталше-влаклан вийым ешарен. Мый финишыш нылымше пуренам.…