Медведево посёлкысо Йоча усталык пӧрт пеленысе «Родничок» изостудий ден «Объектив» фотостудийын ик эн кугу пашашт – «Шӧртньӧ талиҥга» марий калык легенде почеш войзымо фильм. Тидын нерген проектын авторжо, вуйлатышыже Л.В.Сазонова дене мутланышна.
– Лилия Вениаминовна, тыгай фильмым войзаш шонымаш кузе шочын?
– 2017 ийыште финн сӱретче Санна Хукканенын мастер-классыштыже лийынам. Тушто ме шочмо йылме дене комикс-влакым сӱретлаш тунемынна. Вара йоча-влакым шӱмаҥденам. 2019 ийыште «Культурная мозаика малых городов и сёл» грант-влак конкурсышто «Медведевское золото» проектна дене сеҥышыш лектынна. Тиде проектлан кӧра марий йомак ден легенде-влакым лудаш, марий калык вургемым шымлаш тӱҥалынна, марий калык йӱла, тӱвыра дене палыме лийынна. «Шӧртньӧ талиҥга» легенде почеш эн ондак комиксым сӱретленна. Тудо книга гай лектын. Югра гыч йолташем-влак финн-угор фестивальышке ушнаш ӱжыныт. Конкурсын условийже почеш, финн-угор йылме тӱшкаш пурышо йылме дене фильмым войзыман. Тыге ме марий калык легенде почеш фильмым сниматлаш пижынна.
– Фильм дене кӧмыт пашам ыштеныт?
– Сӱрет-влакым Юля Садкова сӱретлен, текстым Даша Милютина лудын. Дашалан аваже Наталия Милютина полшен. Текстым Йоча усталык пӧртын завучшо Татьяна Ивановна Кудрявцева терген. Монтажым Костя Овечкин ыштен, йӱкым Рома Грела келыштарен. Тичмаш фильмым мый войзенам.
– Ончыкылык шонымашда могай?
– Ме марий калыкын тӱвыражым ончыкыжымат шымлаш тӱҥалына. Марий йомак ден легенде-влак почеш ятыр фильмым сниматлаш шонена.
– Пашада ушныжо, фестивальыште сеҥымашым тыланем.
