Екатеринбург оласе Б.Н.Ельцин лӱмеш Урал федерал университетыште физкультур дене всероссийский олимпиаде эртаралтын. Российын 78 регионжо гыч 258 тунемше уш-акылжым да вийжым терген. Йошкар-Оласе Бауман лицейын тунемшыже Николай Ермаков сеҥышыш лектын. Ӱдыр-рвезе-влак куштылго атлетике, теорий, гимнастике, спорт модыш да прикладной физкультур дене тергымашым эртеныт.
– Лицейысе уста туныктышо-влакын тыршымыштлан, тунемшым кажне кечын ямдылымыштлан кӧра сеҥымашке шуынна. Тӱжем гана «Тый кертат» манын ойлымо арам лийын огыл. Ме сеҥенна, – ойла физкультурым туныктышо И.В.Николаева.
