Калыкыште туныктышым ава дене таҥастарат. Вет тудо школыш толшо йочам лишыл еҥ семынак арала, тудын верч мутым куча да, йӧратен, шыматен, улан туныкта. У Торъял округ Токтарсола тӱҥ школышто икымше гана парт коклашке шичше шым ӱдыр-рвезылан Дарья Ивановна Быкова (снимкыште) – лач тыгай еҥ.
У Торъял округ Токтарсола тӱҥ школышто – 54 тунемше. 15 чолга, виян туныктышо келге шинчымашым пуа. Нунын радамыш ке тений кум самырык еҥ ушнен. Тӱҥалтыш класслам вуйлаташ да англичан йылмым туныкташ тукым ака-шӱжар Дарья Ивановна ден Кристина Владимировна Быкова мытлан, йоча-влакым спорт деке шӱмаҥдаш Сергей Сергеевич Глушковлан ӱшаненыт.
– Тыште кугу опытан педагог-влак пашам ыштат. Нуно ой каҥаш дене полшат, кӱлеш книгам налаш темлат. Мыланна, самырык туныктышо-шамычлан, настав никым ойыреныт. Мый 3-шо классын вуйлатышыже, поро да чолга ӱдырамаш Майя Михайловна Петуховалан эҥертем. Тудым ончен умылем: туныктышо-влак нигунам огыт шоҥгем, йоча пелен йоча гаяк койын моштат. Профессий чонемлан лишыл. Ӱдыр-рвезе-влакат мыйым кече еда улан туныктат, – ойла Д.И.Быкова.
Школым олмыктымо
«Молодёжь и дети» нацпроект да «Единая Россия» партийын калык программыжлан кӧра Токтарсола школым тений капитально олмыктеныт. Школ ончык асфальтым шараш да печым печаш район админи страций полшен. Тидын дене школ директор Галина Валерьевна Садовина палдарыш.
– Школ оралте кӧргым уэмденыт. Кӱварым, пырдыжым, туврашым олмыктеныт. Чыла сантехникым, окнам вашталтеныт. У мебельым пуэныт. Икманаш, тунемаш, шинчымашым пуаш сай йӧным ыштеныт, – ешарыш директорын туныктымо да воспитаний паша шотышто алмаштышыже Людмила Ивановна Полякова.
Уста йочам куштат
Токтарсола школышто Э.Н.Сапаев лӱмеш У Торъял йоча усталык школын филиалже верланен. Тушко семӱзгар дене шокташ, сӱретлаш тунемаш да хоровой пӧлкаште мастарлыкым вияҥдаш кумылан икшыве-влак коштыт. Школ пелен «Висвис» ден «Весёлые нотки» мурышо ансамбль-шамыч улыт. 12 кружок пашам ышта. Икшыве-влакым заметкым возаш туныкташ, медиа тӱня дене палдараш манын, тений «Юнкор» кружокым почыныт. Тудым Дарья Иванов на вӱдаш тӱҥалын. Ты поро шонымаш дене келшен, «Ямде лий» ден «Кугарня» газетлаште пашам ыштыше-влак школыш унала миенна. Вашлиймаш пайдалын эртен. Тунемше-шамычым газет паша дене палдаренна. Модмаште ойыртемалтше ӱдыр-рвезе-шамычлан пӧлекым кучыктенна.
«Юнкор» кружокыш коштшо икшыве-влаклан чолгалыкым тыланена, перада пӱсӧ лийже. Пашадам «Ямде лий» газетыште уло кумылын вучена.
Оля МАЙКОВА.
Авторын фотожо.
