Шернур посёлко деч мӱндырнак огыл, кумда пасу, шӱшпыкан чашкер, кадыргыл йогышо эҥер воктене Изи Лужалу ял верланен. Тиде сылне верыште 1898 ий 27 мартыште йорло кресаньык ешыште ончыкылык марий писатель Шабдар Осып (Иосиф Архипович Шабдаров) шочын. Тудын шочмыжлан 125 ий теммылан пӧлеклалтше пайрем серызын лӱмжым нумалше Мустай кыдалаш школышто эртаралтын.
Пайремыш толшо уна-влак лӱмлӧ поэтым, драматургым, педагогым да литературоведым эн ончыч Изи Лужалу ялыште верланыше кӱ воктене шарналтеныт. Тудым писательын пӧрт олмыштыжо 2007 ийыште шындыме. Шабдар Осыпын тукымжым шуйышо, 6-шо классыште тунемше Антон Адиганов пеледышым пыштен (снимкыште).
Мустай школын тунемшыже-влак писательын произведенийлаже почеш сӱрет ончерым ямдыленыт, сценкым модын ончыктеныт. Сценыште ойгырен шинчыше изи рвезым ужмеке, вигак пале лийын: тиде Кориш. Тудын рольжым Максим Макаров сайын модын. Рвезылан «Ямде лий» газет редакций лӱм дене пӧлекым кучыктымо.
Пайремым вӱдышӧ-влак, 8-ше классыште тунемше Катя Ибраева ден директорын воспитаний паша шотышто алмаштышыже Артём Алексеевич Паймаков, писательын илыш корныж дене палдареныт.
– Мый Шабдар Осыпым ковамын ойлымыж гыч шарнем. Анна Архиповна тудын шӱжарже лийын, – ойлен Шернур муниципал образованийым вуйлатыше С.Л.Адиганов. – Тиде еш пеш нужнан илен, ял еда йодышт кошташат пернен. Шабдар Осып чыла тидым чытен лектын, кугу кӱкшытыш шуын, йолташыже да палымыже-влаклан пример лийын.
