Тений мый Шем теҥыз воктене икымше гана лийынам. Тудо мыйым кугытшо да моторлыкшо дене ӧрыктарен. Ме теҥыз воктене кок арня иленна. Теҥызын йӱкланымыжым йӱдшӧ-кечыже колынна. Кажне кечын йӱштылынна, тӱрлӧ сылне верым ончен коштынна. «Ласточкино гнездо» замок келшен. Тудо теҥыз ӱмбалне, кечалтше курык тӱрыштӧ, верланен. Воктекыже ошкылмо годым лӱдыкшын, чонлан копыж-ж-ж чучын. Пуйто волен возеш, шонет. Воронцовский, Ливадийский полат-шамычым икымше гана ужынам. Волгоград, Краснодар, Ялта, Крым да моло олам куанен онченам. Ай-Петри курык кумылем эн чот савырен. Йомакысе гай чучын: кӱкшӧ, мотор да ӧрыктарыше. Российын сылне верлажым весканат ужаш кумыл уло.
Елизавета ВЕТКИНА.
Йошкар-Оласе 31-ше номеран школ.
