Эше ик идалык мучашке лишемеш. Кажныже шуктен шогымо сомылжылан акым пуа, иктешлымашым ышта, ончыкылык паша радамым рашемда. Йоча газет редакцият ӧрдыжеш ок код. Тунемше-шамычлан увертарыме тӱрлӧ конкурсым иктешлена, сеҥыше-влакым палемдена да пӧлекым кучыктена. 12 декабрьыште Республикысе йоча да самырык-влаклан В.Х.Колумб лӱмеш книгагудышто «Рвезе йӱк» да «Марий Эл – мыйын шочмо вер» республикысе сылнымут конкурслаште сеҥыше-шамычым саламлышна.
Палемдыман: «Рвезе йӱк» конкурсым Марий Элын калык писательже Вячеслав Абукаев-Эмгак лӱмеш «Ший памаш» поро кумылым ончыктымо сылнымут фонд дене пырля ий еда эртарена. Ты фондым серызе Василий Краснов вуйлата. Василий Владимировичлан кугу таум ойлена.
Тӱрлӧ премий – тӱрлӧ сеҥыше
Ойыртемалтше да чолга юнкор-влакым лауреат лӱм дене палемдымаш – «Ямде лий» газетын поро йӱлаже. Кодшо курымын 80-ше ийлаштыжак ты пайдале паша илышыш шыҥдаралтын да ятыр ӱдыр-рвезе лауреат лӱмым сеҥен налын.
2025 ийым иктешлыме почеш йоча газетын икымше редакторжо Зинаида Яковлева лӱмеш премий дене Советский район Кельмаксола школышто 9-ше классыште тунемше Юлия Ягодарова суапландаралте. Тудо «Ямде лий» газет дене изинек пеҥгыде кылым куча. Журналистикын тӱрлӧ жанрже дене палыме лиеш да газет лаштыклам пашаж дене пойдара. Юлия З.Яковлева лӱмеш премийын лауреатше лӱм дене кокымшо гана палемдалте.
Уста журналист, серызе да «Ямде лий» газетыште 1967-1988 ийлаште пашам ыштыше Валентин Исенеков лӱмеш премийын лауреатше лӱмым Волжский район Сотнур школышто 7-ше классыште тунемше-влак сулен нальыч. Нуным руш йылмым да литературым туныктышо Эвелина Анатольевна Егорова вуйлата.
– Юнкор пашалан мемнам туныктышына кумылаҥда. Тӱрлӧ теме почеш заметке-шамычым возаш тарата. Серызе-влакын лӱмгечышт вашеш заданий-шамычым ыштена, сылнымутлаштым лончылена, шке шонымашнам серена. «Ямде лий» газетым иквереш лончылена, возымо пашана-влак савыкталтмеке, моткоч куанена, – ойлат Рафаила Дмитриева ден Андрей Ушков.
Андрей Ушков нерген поснак палемден кодыман. Рвезе пырля тунемме йолташыже-влак дене тӱшка пашашке ушна, тылеч посна шке гыч сылнымутым возкала. Тудо поэзийлан шӱман. Андрейын кыртмен тыршымыжым шотыш налын, Антонов Ивук лӱмеш премийым кучыктымо. Рвезылан ӱшан уло: ончыкыжым сылнымутшо дене йоча да тыгак кугыеҥ-шамычым куандараш тӱҥалеш манын шонена. Премийым кучыктымо годым «Ончыко» журналын тӱҥ редакторжо Игорь Попов каласыш: «Поэзий аланыште рвезын йӱкшӧ моткоч шергакан да кӱлешан. Илен-толын, тый, Андрей, ты премийым самырык тукымлан тыгак кучыкташ тӱҥалат манын ӱшанем».
Йоча газет редакций дене пеҥ- гыде кылым кучышо кугыеҥ-шамычым «Почётан юнкор» радамыш пуртымо йӱланам умбакыже шуен, ты ганат пӧлекым пуэн саламлышна. Тиде лӱмым Йошкар-Оласе 80-ше номеран «Ӱжара» йочасадын воспитательже Надежда Годунова сулен нале.
Шочмо верым моктат
Марий туныктыш институт дене пырля эртарыме «Марий Эл – мыйын шочмо вер» республикысе сылнымут конкурсыш тӱрлӧ районысо да оласе школлаште тунемше шӱдӧ утла ӱдыр-рвезе ушнен. Кум номинаций лийын. Йоча-шамычын ийготыштым шотыш налын, сеҥыше-шамычым палемдыме. Нунын лӱмыштым 2025 ий 28 ноябрьыште лекше «Ямде лий» газетыште савыктыме.
Ӱдыр-рвезе-шамычым Марий туныктыш институтын шанче-шымлыме паша дене проректоржо Н.В.Гусева ден институтышто марий филологий да культурологий кафедрым вуйлатыше Е.И.Игнатьева саламлышт да диплом ден пӧлекым кучыктышт.
– Пайремышке шочмо кундемнам пагалыше, йылмынам аклыше да «Ямде лий» газетын лишыл да ӱшанле йолташыже-шамыч погынен улыда. Ончыкыжымат тыгаяк койыш-шоктышан лийза, тӱҥалме пашадам умбакыже шуйыза, – ойлыш Надежда Васильевна.
Людмила ГРИГОРЬЕВА.
Оля Майкован фотожо.
Снимкыште: Юлия Ягодарова, Надежда Годунова, Андрей Ушков, Рафаила Дмитриева.
