Настя Павлова – Пошкырт кундем Мишкан район Монар ялысе тӱвыра полат пеленысе «Ший памаш» ансамбльын шӱдыржӧ. Ансамбльыш шым ияш кошташ тӱҥалын. «Куштымаш деч посна ик кечат илен ом керт», – ойла тудо. Кажне кастене, урок деч вара, йӧратыме коллективышкыже вашка. Кушташ ӱдырым Серафима коваже кумылаҥден.
– Ковам медшӱжарлан тунем лектын гынат, вес корным ойырен. Мо палем, эре мура. Марий семым чӱкта да мыйым кушташ йодеш, шкеже пырля мура, – ойла Настя. – Ансамбль дене шуко конкурслаште лийынна. «Кушталташ йодеш чонем» районысо фестивальыште кажне ийын мастарлыкнам ончыктена.
