23 апрельыште Республикысе марий тӱвыра рӱдер С.Г.Чавайн лӱмеш Национальный книгагудышто «Ший талешке» республикысе конференцийым эртарен. Тушко Морко, Шернур, Волжский, Советский, Марий Турек, Медведево районла да Йошкар-Ола гыч ушненыт. Ӱдыр-рвезе-влакын шымлымаш пашаштышт марий серызе А.Тимофеевын, самырык поэт В.Комаровын, палыме шымлызе А.Куклинын, режиссёр, драматург А.Якушеван, серызе, скрипке дене шоктышо И.Ивановын да молын лӱмышт йоҥгеныт. Тунемше-влак уверым книгаште, газетыште, журналыште, тоштерыште, архивыште кычалыныт. Краеведенийлан шӱман улмышт шымлымаш пашам эртараш полшен. Самырык тукым марий йылмыжым, тӱвыражым аклаш да чапландараш тӱҥалеш гын, марий калык коклаште талешке-влак ятырын лийыт.
«Шкенан историйнам шарнена» таҥасыште 1-ше верыш лектыныт: Карина Борисова (6-шо номеран Морко школ), Алина Владимирова, Аня Ефимова (Волжский, Памар). Снимкыште Алина ден Аням Писатель ушем вуйлатыше С.Д.Архипова дене пырля ужыда. «Мыйын марий мландем» таҥасыште Егор Медведев (Шернур, Мустай) ден Даша Юрьева (И.С.Палантай лӱмеш тӱвыра да сымыктыш колледжын национальный гимназийже) ойыртемалтыныт.
