Кугезе ковам Зоя Ивановна Тимофеева Морко район Ердӱр ялеш 1931 ий 25 ноябрьыште шочын. Йоча пагытше Кугу Ачамланде сар годым эртен. Ачаже Иван Яковлевич Яковлев 1941 ийыште сарыш каен. Чыла нелылык ӱдырамаш да йоча-влакын вачӱмбакышт возын. Зоя ковам 10 ияшак сӧсна фермыште тыршен, шудым солаш коштын. Сар жапысе неле илышым кызыт шинчавӱд йӧре шарналта: «Сарже мо тыгай, тунам паленат огынал. Пӧръеҥ -шамычым военкоматыш ӱжыкташ тӱҥальыч, ачамат кайыш. Ялыште утларакше шоҥгыеҥ, ӱдырамаш да йоча-влак кодыч. Кочкаш шагал, шӱйшӧ пареҥган киндымат кочкаш логалын. Ачамын сар гыч пӧртылмыжым чот вученам. Ты кече эн пиалан ыле. Чаманаш веле логалеш, сар деч вара тудлан сайын илаш эрыкым ышт пу: пленыш логалмыжлан кӧра ӧрдыжкӧ пашаш колтышт. Авам дене пырля ачам деке мыят ик гана миенам. Куржын миен ӧндалмем – тачат шинча ончылнем. Тылеч вара ачамым ужаш пӱралтын огыл. Пӧртвуй гыч камвозын манме шучко увер икмыняр жап гыч тольо. Авам шым икшыве дене (кокытшо ашнаш налме лийын) тулыкеш кодо. Тыгай шучко жапым нигӧлан ужаш ынже пӱрӧ».
Кугезе ковам деке чӱчкыдын кошташ тыршем. Кызыт тудо Усола ялыште Рая ковам дене ила. Таза лий, Зоя ковам.
Настя ИВАНОВА.
Морко, Коркатово.
