Тунемме идалык мучко тӱрлӧ олимпиадыште уш-акылыштым тергыше да сеҥымашке шушо ӱдыр-рвезе-влаклан да нунын наставникыштлан Марий Эл Республикысе Правительстве Вуйлатышын алмаштышыже – тӱвыра, печать да калык-влакын пашашт шотышто министр Константин Иванов ден Образований да науко министр Лариса Ревуцкая правительствын грантшым кучыктеныт (снимкыште). Тенийысе лектыш поснак куандарыше. Всероссийский олимпиадын пытартыш йыжыҥыштыже куд тунемше сеҥыше але призёр лийын. Ты олимпиаде «Молодёжь и дети» нацпроект почеш эртаралтеш. 17 ӱдыр-рвезе этнокультур предметла дене регион-влак кокласе олимпиадыште сеҥымыжлан да 46 тунемше российысе олимпиадын регионысо этапыштыже ойыртемалтмыжлан грантым налыныт. Этнокультур предметла дене республикысе олимпиадыште 52 сеҥыше ден призёрым саламленыт.
– Педагог-влакын мунло каҥашыштлан, ача-ава-шамычын полышыштлан да шкендан кыртмен тыршымыланда кӧра тыгай сеҥымашке шуында. Ончыкыжымат уш-акылдам эре пойдарыза, тыгаяк чолга, шонымашке шуаш тыршыше лийза. А ме тыланда полшаш эре ямде улына! – ойлен Лариса Ревуцкая.
Людмила ГРИГОРЬЕВА ямдылен.
Фотом Марий Эл Республикысе Образований да науко министерствын «ВКонтакте» воткылысе тӱшкаж гыч налме
