Шинчымаш кече – тиде икымше йыҥгыр йӱк да тургыжланымаш, пеледыш да ош бантик тӱня, йӱлаш пурышо тыныслык урок, йолташ ден туныктышо-влак… Школ омса лондемым икымше гана вончышо да парт коклашке икымше гана шичше йочалан 1 сентябрь эн чот вучымо кече. Тудын ончылныжо илышын у да кумда йыжыҥже почылтеш.
Кеҥеж каникул жапыште пустаҥ шинчыше класс-влак уэш йоча йӱк дене шергылтыт. Российысе Просвещений министрже С.С.Кравцовын ойжо почеш, кумда Российыште Шинчымаш кечым 18,5 миллион йоча вашлиеш. Тышеч 1,8 миллион ӱдыр-рвезылан пайрем кечын йыҥгыр йӱк икымше гана йоҥгалтеш. Нине икшыве-шамыч радамышке Антон Григорьеват ушна. Тудо Йошкар-Оласе 31-ше номеран кыдалаш школышто 1-ше «А» классыште шинчымашым погаш тӱҥалеш. Изи рвезылан ты тунемме тӧнеж поснак лишыл. Аня акажат тыштак тӱҥалтыш класслам тунем пытарен, 5-ше классыш вончен. Ынде эстафетым шольыжлан пуа. Нуным снимкыште ужыда.
– Ешыште – кок тунемше. Когыньыштымат эскерыман, кӱлеш годым полшыман, ой-каҥашым пуыман. Очыни, садлан чонышто тургыжланымаш уло, – ойла ака-шольын авашт Марина Владимировна. – Вес могырым, шкем лыпландарем: Антон Аня дене пырля тунемын кушкын: шотлен, возен, лудын мошта. Тек икшывем-шамычын школ илышышт куандарыше, кумылым савырыше лиеш.
Лач тыгак каласыме шуэш моло ӱдыр-рвезыланат. Кеҥеж мучко вийым поген канымеке, шинчымаш тӱняшке ӱшанле ошкылым ыштыза. Кажне у кече сеҥымашлан поян лийже.
Л.ГРИГОРЬЕВА.
