Йоча-влакын каникулышт мучашлалтеш. Парт коклашке уэш шинчаш жап шуэш. Йошкар-Оласе школ пазарыште ача-ава-влак икшывышт дене куткышуэ семын шолыт, школыш каяш ямдылалтыт. Тушко мыят миен коштым. Ужалыме палаткылаште мо гына уке: тетрадь, альбом, тӱрлӧ ручка, карандаш, клей, рюкзак да молат. Пазарыште районла гыч толшо марий-влакым ужаш поснак куанле ыле. Икмынярышт дене лишкырак палыме лийна. Теве Советский район Кельмаксола гыч Даша Рябинина шканже мотор блузкым да юбкым ойырен. Матвей шольыжо чонжылан келшыше спорт костюмым муын, тувырым онча. Медведево посёлко гыч Андрей Смирнов 3-шо классыш каяш ямдылалтеш. Пазарышке чапле рюкзакым ойыраш аваж дене пырля толын. Йошкар-Ола гыч акак-шӱжарак Софья ден Вера Максимовамыт сумка тич тетрадьым погеныт. Ынде дневникым ойырат.
– 1-ше сентябрьым моткоч вучена. Мотор дневникым кычалына. Тудым сылне оценке-влак дене сӧрастараш тыршаш тӱҥалына, – ойлат ӱдыр-влак.
Йочам школлан ямдылаш окса шагал огыл кӱлеш. Тӱрлӧ арвер да вургем ак ий гыч ийыш шергештеш. Йошкар-Оласе Рӱдӧ пазарым шергал лектын, ак дене палыме лийым. Тыглай тетрадьым ончалаш гын, лаштыкын чотшым шотыш налын, 12-25 теҥге шога. Посна предметлан келыштарыме тетрадь-влак – 40-55 теҥге. Альбомым 50-90 теҥгелан налаш лиеш. Дневниклан 50-120 теҥгем тӱлыман. Пенал-влак куэмышт, кугытышт дене ойыртемалтыт, садлан 60-550 теҥгеашым муаш лиеш. Ручка – 5-50 теҥге. Акварель чия – 85-150 теҥге. Клей – 20-40 теҥге. Книгалан подставке – 70-90 теҥге. Рюкзак 1500-4000 теҥге шога.
Школлан арверым, вургемым кушто наледат? Тений йочам школышко погаш мыняр шийвундо кӱлеш? Тидын нерген ава-влак деч йодыштым.
Н.Л.ЕГОШИНА (У Торъял посёлко):
– Мемнан дене пазарыште, кевытлаште утларак наледат. Южышт интернет йӧн дене пайдаланат. Школышто икгай формым чият. Вургемым Йошкар-Олаште ургыктена. ™дыр-влаклан – сарафан, южышт юбкымат налыт. Тидлан ныл тӱжем теҥге наре кӱлеш. Эше блузкым, туфльым да молымат налман. Канцтоварат шулдо огыл. Чылаже кум тӱжем теҥгем тӱлышна. Школышко ӱдыр икшывым колташ 15-18 тӱжем теҥге кӱлеш, рвезылан – 13-15 тӱжем теҥге.
А.Е.МИХАЙЛОВА (Волжск ола):
– Кызытсе саманыште йочам школышко погаш куштылгыжак огыл. Кок эргым Волжск оласе 12-шо номеран школышто тунемеш. Кугуракше визымше классыш вончен, изиракше – кумшыш. Тетрадьым, ручкам да моло канцтоварым июньыштак налынна. Вургем кӱлеш гын, чыла воктенак. Эргым-влак кеҥеж мучко палынак кушкыныт улмаш. Садлан школ формым, моло вургемым уэмдышна. Тидлан шагал огыл шийвундым луктын пышташ логале. Тунемше ден туныктышо-влакым шушаш у тунемме ий дене саламлем! У кӱкшытым, чытымашым, пеҥгыде тазалыкым тыланем.
Л.П.АГАЧЕВА (Йошкар-Ола):
– Эргым тений парт коклашке икымше гана шинчеш. Школ формым класс дене ик вере ургыктенна. Йолаш, жилет, кок тувыр 6450 теҥгешке шуыныт. Канцтоварым кевытыште наледенна. Тидлан куд тӱжем теҥге наре кӱлын. Кугурак эргым Палантай лӱмеш тӱвыра да сымыктыш колледжыш тунемаш пурен. Тӱҥжӧ – сайын тунемышт, таза лийышт.
