Медиаклассыште шинчымашым погымо дене пырля практике сынан урок-влак лиедат. Пресс-конференцийлашкат ушнена. Бокс дене тӱнямбал чемпион Рой Джонс, Олимпийский модмашын кок гана чемпионжо Олег Саитов да спорт менеджер Владимир Хрюнов Марий Элышке шукерте огыл толыныт. Нунын дене вашлиймаште лийынна. Рой Джонс англичан йылме дене кутырен, мыланна кусареныт. Ме ик йодышым англичан йылме дене пуэнна!
Вес кечын «Шӧртньӧ Витязь» тӱнямбал кинофорумышто лийынна. Рӱдолаште кум кече жапыште 15 кином ончыктеныт. Фильм-влак сар годсо илышыш пӧртылтеныт, калыкын лӱддымылыкшӧ нерген ушештареныт.
Пресс-конференцийлаште журналист-шамычын кузе пашам ыштымыштым эскеренна. Тыгай паша мыланна кугу опытым пуа.
Елизавета ЕФИМОВА.
