Йоча серызе Юлия Лавренченко пион нерген оҥай йомакым возен. Тудым тӱткын лудса да икмыняр йодышлан вашештыза.
ПионИлен улмаш изи мотор пион. Но тудо шкеж нерген удам веле шонен, ситыдымашым веле ужын: теве пеледыш лышташыже, теве тӱсшӧ огыт келше, теве вургыжо кошкаш тӱҥалын.
Икана эрдене пион помыжалтын, ончалын – пеледыш лышташыже йомын. Мӱгырен шортын колтен. Тидым кече шекланен да пионлан полшаш шонен пыштен.
– Мотор пеледыш, тый молан шортат? – йодын кече.
– Кузе мый мотор лийын кертам? Мыйын ик лышташем уке, – пелештен пион.
– А молышт верыштышт улыт, – ныжылгын шыргыжалын кече. – Тудо лышташын, очыни, ӱмыржӧ эртен да чоҥештен. Ончал, олмыштыжо кок у изи лышташ шочын. Тый тыгай мотор улат, ик лышташлан кӧра тургыжланаш ок кӱл.
– Пеледыш лышташем ош тӱсан лиеш гын, можыч, тургыжланашат ок кӱл ыле, – ойлен пион.
– Да тыйын пеледышлыкет моткоч мотор тӱсан – кына! – лыпландарен кече. – Ситыдымаш нерген мондо да моторлыкетлан кугурак тӱткышым ойыро.
Пион кечын шомакшым шотыш налын огыл, шинчажым веле петырен. Но вара кажне пеледышыжым, вургыжым, лӧза ужар лышташыжым тӱткын эскерен. Эсогыл шкенжым йӧратен шындымыжымат умылен огыл. Шкенжын ӱмбаке йывыртен ончышыжла, ситыдымашыж нерген йӧршын монден.
– Чынак, мый мотор улам! – куанен каласен.
– Теве ужат, тый нимыняр вашталтын отыл, лач шкендым вес семын аклаш тӱҥалынат, – шыргыжал умылтарен кече. – Тый ынде ситыдымашлан огыл, моторлыклан тӱткышым ойырет. Саламлем!
– Мый сылне улам. Вес семын лийынжат ок керт, – вашештен пион.
– Тыгай мотор пеледыш лышташет-влак улмо ӱмбач икте верч тургыжланыман огыл манын, чын ойленам. Шарне: тыйын моторлыкет ситыдымаш деч икмыняр пачаш шукырак, – ешарен кече.
Тылеч вара пион ситыдымашым кычалын огыл, моторлыкым веле ужын. Тиде чонжылан кугу куаным пӧлеклен.
Йодыш-влак
- Пион молан ситыдымашым кычалын?
- Мумекше, мом шижын?
- Моторлыкым ужаш кӧ да кузе туныктен?
- Сӧрал улмыжым умылымеке, пионын чоныштыжо могай кумыл озаланен?
- Молан тӱткышым утларак ойырыман? Молан тыге шонеда?
Христина АЛЕКСАНДРОВА ямдылен.
