Сылнымутлан шӱман, газет да журнал-влак дене кылым кучышо ӱдыр-рвезе-влакым У Торъял районысо Токтарсола школ эртыше идалык мучаште иквереш чумырен. Тушто юнкор толкынын республиканский площадкыже эртаралтын. Вашлиймашым Марий Эллан 100 ий да Сеҥымашлан 75 ий теммылан пӧлекленыт.
Йоча-влак школысо юнкор пашашт дене палдареныт. Токтарсола школышто «Тулвий» юнкор кружок (снимкыште) тылзе еда «Рвезе йӱк» газетым луктеш. Марий Турек районысо Сардаял школышто «Шонанпыл» юнкор кружокыш 9 йоча коштеш. Нуным марий йылмым туныктышо К.П.Плотникова вуйлата. «Юнкор сомылым шукташ «Кружок» независимый образовательный проектын чолга еҥже-влакын эртарыме журналистике школышто налме шинчымаш кугун полша», – ойла Ксения Платоновна. «Рвезе йӱк» (У Торъял, Кузнеч) юнкор кружок 2018 ийыште В.Б.Исенеков лӱмеш премийым сулен. Тунемше-влак йоча газет дене кызытат пеҥгыде кылым кучат. – Шернур районысо Марисола кундемыште мыняр ял – тунар возышо, эше икте веле огыл, – кугешнен ойла Марисола школын тунемшыже Андрей Максимов. 1929 ий гыч школышто юнкор сомыл шуйна. Кызыт электрон йӧн дене «Факел» газетым ямдылат, «Ший оҥгыр» пырдыжгазетым луктыт. Юнкор-влак дене пашам туныктышо-влак С.В.Петухова ден С.М.Максимова вӱдат.
Погынымаште У Торъял, Элембай (У Торъял район) школла гыч сылнымутыш тӱҥалтыш ошкылым ыштыше ӱдыр-рвезе-влак лийыныт.
Ӱжмӧ уна-влак: «Ончыко» журналын тӱҥ редакторжо, поэт И.Г.Попов, ты журналын пашаеҥже, Марий Эл Республикын сулло журналистше Б.А.Шамиев да «Ямде лий» газетын пашаеҥже Л.Н.Григорьева – поэзий, прозо да публицистике секцийлаште мастер-классым эртареныт.
