«Кельмаксолаште пеш сылне ӱжара. Кельмаксолаште кастен гармонь мура…», – йоҥгалтеш ик мурышто. Чын, тушто гармонист-влак шукын улыт, но Советский районысо Кельмаксола школышто шочмо марий йылмымат келгын тунемыт да сайын палат. 11-ше классыште шинчымашым погышо Дарья Загайнова поснак ойыртемалтеш.
– Кодшо ийын марий йылме дене олимпиадын чыла йыжыҥыштыже икымше лийынам, тений регион-влак кокласе этапыште кумшо верым налынам. Изиш кумылемат волен ыле. Но ачам лыпландарен моштыш. Ончыкыжым утларак тыршаш тӱҥалам. Шочмо йылмем авам гай ныжылге да лывырге, ачам гай мотор, изам гай чапле, – ойла Даша.
Ӱдыр деч йодде шым керт: «Тендан мутланымыда ойыртемалтеш. Литератур йылмым умылаш неле огыл?» Йодышемлан тыге вашештыш:
– Кужмара, Кельмаксола, Шуарсола кундемыште илыше калык «ц» дене кутыра. Тыге мутланымаш тукым гыч тукымыш куснен. Мый нимыняр ом вожыл. Литератур йылме денат сайын мутланен моштем. Марий йылмым туныктышо Ирина Валериановна Караваевалан келге шинчымашым пуымыжлан тауштем. Шке диалектнам арлен кодыман. Тудо мемнан поянлыкна.
Даша «Марла чын возена» тӱшка диктантышке кажне ийын ушна да сай шинчымашан улмыжым ончыкта. Сочиненийымат устан сера. Поэт-фронтовик В.Я.Рожкинын 110 ияш лӱмгечыжлан пӧлеклалтше конкурсышто сочиненийым возымаште икымше верым налын.
– Мыйын шонымаште, шочмо йылмым палымаш – тиде мемнан порысна. Шочмо вер деч тораште улмо годым марла мутланымым колатат, шулдыраҥмыла чучеш, – ойла Даша.
Х.АЛЕКСАНДРОВА.
Фотом еш архив гыч налме.
