Кеҥежым шокшо игече годым айдемылан веле огыл, янлык ден кайыквусылан, суртвольык ден сурткайык, сурт янлыкланат куштылго огыл. А кужу, чока пунан пий-влак ты пагытым кузе илен эртарат? Нуным эскерыме шотышто Йошкар-Ола гыч ветеринар врач, грумер Н.В.Васильева (снимкыште) дене мутланышна.
— Нина Валериановна, яллаште ятыр еҥ кужу пунан пийжым тӱредеш. Кеч-могай урлык пийым тӱредаш лиеш мо?
— Пӱртӱс пийлан пуным пӧлеклен, садлан нуно шокшо игечылан тунемше улыт. Пӱжвӱдышт йылме, копа гоч лектеш. Утыжым кудалыштыктыман, модыктыман огыл. Тыгай игечыште тек канат. Чынак, пийым шукын шке гыч тӱредыт. Но чыла урлык пийым тӱредаш ок лий. Шпиц урлык пийым кӱчыкын тӱредман огыл, тетла пунжо огеш куш. Садлан мучашыжым веле кӱчыкемдыман. Тыгак лабрадорым, хаским да ятыр моло урлыкымат тӱредаш ок лий. Коваштышт кече дене когарген кертеш, эше черланат. А йоркширский терьерым кеч кажне тылзын тӱред, но тудымат эскерыман. Кызыт пийлан шуко тӱрлӧ вургем уло. Кечан годым мамык куэм гыч ургымо куштылго майкым чикташ лиеш.
— Южышт пийыштым чаманат да верысе пӱяш йӱштылаш пуртат. Тиде пийын тазалыкшылан эҥгекым ок ыште?
— Пийым кеч-могай вӱдыш йӱштылаш пурташ келшен толеш. Тӱҥжӧ — вӱд яндар лийже. Пий вӱдпорсын коклаш ынже пӱтырналт манын шекланыман. Тудым вӱдыш трукышто шуыман огыл, тек шке семынже пура.
— Шокшо игече годым пийым мо дене сийлаш темледа?
— Эн ончыч ӱмылан верыш вераҥдыман. Шукырак вӱдым пуыман. Мискыш темен, икмыняр вере шындаш лиеш. Пульверизатор дене вӱдым жапын-жапын шыжыктыман. Шокшышто кочкыш писын локтылалтеш, садлан иканаште шуко пуыман огыл. Тӱҥжӧ — кочкыш шопышо ынже лий.
— Пий утыждене ырен манын, кузе палаш лиеш?
— Тыгодым пий эркын тарванылеш, кок могырыш лупшалт ошкылеш. Ӱжат — огеш ончал, чӱчкыдын шӱла. Ныл йолан йолташдам аралыза, кеч-могай жапыште полшаш ямде лийза.
Христина АЛЕКСАНДРОВА мутланен.
Фотом еш архив гыч налме.
