Шонанпыл гай пакча

Курыкмарий район Йынгы Парингӓште илыше Федосеевмытын сад-пакчашкыже пурымек, йомакыш логалме гай чучеш. Йырым-йыр олмапу, вишне, сливе кушкыт. Пече воктек изирак мардеж вакшым вераҥденыт. Аист шке пыжашыштыже илыше гай койын шога. Йыраҥ-влак коклаште шоҥшо да моло фигур дене сӧрастарыме вер эшеат йытыран коеш. Пакча шонанпыл гай тӱрлӧ тӱс ден волгалтеш. Кажне пеледыш шке моторлыкшо дене ойыртемалтеш да куандара. Кушкылым ончен куштымо шотышто Анита дене кутырышна. Самырык садовод тыгерак ойла:

– Школышто тунемме годымак авамлан пеледышым шындаш полышкаленам.  Тӱҥалтыш классыш коштмо годым гладиолус вожым налын конденам, варарак – георгиным. Нине сортым кызытат аралем. Интернетыште сад-пакчазе-шамычын лаштыкыштым шергалам, журналлаште лудам. Шинчымашым эре пойдарыман. Опыт икте-весым шындылынак эркын погына.

Школым пытармек, 2012 ийыште Козьмодемьянск оласе «Колледж индустрии и предпринимательства» ГБПОУ-шко тунемаш пуренам. 2013 ийыште шке бизнесым вияҥден колтымо шотышто упрограмме лектын. 2014 ийыште самырык предприниматель-влакын «Агростарт» конкурсышкышт мыят ушненам да проектым возен, грантым сеҥен налынам. Тудо окса дене кок кугу теплицым участкыш шогалтыме. Иктыштыже тӱрлӧ розан вургыжым пӱчкеден шындена да куштена, весыштыже мотор пеледыш аршашым ыштен, ужалаш ямдылкалена.   

– Мыныр сорт розада уло?

– 70 сорт: спрей, английский, плетистый, парковый, шраб да молат. Тылеч посна клематис, княжик, ирис, георгин, вейгела, крокус, тюльпан да эше икмыняр тӱрлӧ пеледыш сад-пакчам сылнештарат. Кажныжын – шке ойыртемже. Южыжо ондак пеледеш, икмынярже – варарак. Чылаштым йоча семын ончыман. Ужалымашыш тыгак туям, лӱмегожым, кипарисовикым, ошкизам луктына.

– Розам кычалтылше пеледыш, маныт. Могай пагытыште шындет гын, вашкерак илана??

– Шошым шындыме роза сайынрак витаминым налын шукта да куштылгын вияҥеш. Вӱдым йӧратыше кушкыл. Садлан шокшо игече годым чотрак шавыман. Мый гын, телылан розам ом левед, шӱйын кертеш. Шукш, копшаҥге дечат эскеренак шогыман. Тыгыде карме, шем кага ынышт пошо манын, кошкышо пеледышым вигак пӱчкеден кораҥдыман.

– Кушкыллан чер пижме годым кузе нуным «эмледа»?

– Мый профессиональный препаратым кучылтам. Ой-каҥашым садак палыше специалист деч йодман да кушкыллан келшышым ойырен налман.

Анитан кок ияш Арианна ӱдыржат аваже да коваже пелен кушкылым изинек йӧратен, сылнылыкым ужын кушкеш. Вӱдым шаваш полша, нуным ончен, лӱмыштым, тӱсыштым палаш тунемеш.

Кеч-могай пеледыш кумылым нӧлта. Ныжылге тӱсшӧ дене чоным куандара.

З.ТИМОФЕЕВА.

А.Федосееван фотожо-влак.