Китне ялысе тӱвыра пӧрт пелен «Шонанпыл» йоча площадке кокымшо ий пашам ышта. Тушко ме куанен коштына. Клуб вуйлатыше Татьяна Григорьевна Ядыкова ден селасе книгагудо пашаеҥ Анна Валентиновна Кибардина кумылан кажне еҥым порын вашлийыт. Тӱрлӧ модмашым, мастер-классым эртарат, спорт таҥасымашке ушат, походыш, экскурсийыш коштыктат, мероприятий-влаклан ямдылат. Рвезе-шамыч футбол командым погеныт. Ме, ӱдыр-влак, волейбол ден пионерболлан утларак кумылан улына. Сӱретлаш, бисер гыч сӧрастарыш-шамычым ышташ йӧратена.
Екатерина РОМАНОВА,
Венера НИКОЛАЕВА.
Марий Турек район.
Фотым тӱвыра пӧртын архивше гыч налме.
