Шонымашке шуаш, кушкаш да шуаралташ ятыр йӧн уло. Икте спортышто вийжым терга, весе мураш-кушташ йӧрата, кумшылан шымлыме паша лишыл. Но иктыже весыжлан чаракым огеш ыште. Шкем тӱрлӧ шӧрыныштӧ тергыше чолга ӱдыр дене «Михаил Мурашко йолташыже-влакым ӱжеш» тӱнямбал фестиваль-конкурсышто палыме лийынам.
Тиде 1-ше номеран Шернур школын тунемшыже Настя Гусева. Тудо «Ласточка» вокал да хореографий ансамбльын чолга участникше. Марий ӱдыр тӱрлӧ проектым воза, конкурслаште мастарлыкшым ончыкта. «XIX курымысо муро» шымлыме пашажым школышто кӱкшын акленыт. «Вектор успеха» тӱнямбал фестивальыште сеҥышыш лектын. У сеҥымашыш шу-аш, шонымашым илышыш шыҥдараш РДШ-ын школысо ушемжым вуйлатыше Л.П.Попова кумылаҥда.
– «Импульс» республикысе лагерьыште вожатыйын курсшым эртенам. Калык ончылно шкем кучымо, йоча-влак дене чын пашам ыштыме нерген шуко оҥайым пален налынам. «Импульсышто» налме шинчымашем ӱдыр-рвезе-влак дене кылым муаш полша. Шке таҥашем-ша-мычлан шонымашке шуаш тыланем, – ойла Настя.
