Йошкар-Оласе «Виктория» йоча музыкальный театр ӱмаште Россий Президентын грантшым сеҥен налын. Тудо таҥасымашке «Плачущее детство» проект дене ушнен. «Плачущее детство» – сарын кочыжым илен лекше йоча-влакын пӱрымашышт нерген спектакль-фильм. Спектакльым Республикысе курчак театрын сценыштыже шынденыт. Постановкышто 68 ӱдыр-рвезе да 37 ияш кугыеҥ модеш. Нунын коклаште – начар тазалыкан йоча-влак.
– Спектакльыште сар, тудын шучкылыкшо, концлагерьысе илыш, Ленинград блокаде, тулыкеш кодшо миллион йоча нерген гына каласкалалтеш. Ме тудын гоч самырык тукымлан ойлынена: шучко сарым, коча-кована-влакын подвигыштым мондышаш огынал; нуно, изи икшывыштым коден, тушман ваштареш кредалаш каеныт, тыныс илышым пӧртылташ нимом чаманен огытыл. Спектакльын действийже тачысе кечын кая. Аваж ден эргыже «Курымашлык полк» акцийыш ушнаш портретым ямдылат. Эргыже йоча-влакын сарыште кредалмышт нерген нимом ок пале, садлан тудлан тиде оҥай огыл. Аваже сарын икшывыже-влакын пӱрымашышт нерген каласкалаш тӱҥалеш, – ойла «Виктория» театрым вуйлатыше В.А.Козицына.
Йоча-влакым 1941-1945 ийлашке пєртылташ манын, эн ончыч сар нерген фильм-влакым ончыктеныт, тӱрлӧ историйым каласкаленыт. Спектакль чоныш логалше ятыр сценкылан поян: шочмо эргыштым йомдарыше ава-влакым шарныктыше куштымаш, курымешлан илыш дене чеверласыше салтак воктене шогышо медшӱжарын мурыжо да молат.
Спектакльын премьерышкыже тылын ветеранже В.А.Медведевам ӱжыныт. Тудлан кызыт – 90 ий. Валентина Афанасьева 11 ияшак колхозышто пашам ыштен. Постановкым ончен, чонжо дене эше ик гана тиде шучко пагытыш пӧртылын да спектакль мучко шинчавӱдшым ӱштын. «Нигӧ ынже пале тиде шучкылыкым» манын ойлен.
Максим ВЕДЕРНИКОВ:– Сар дене кылдалтше спектакльыште модаш куштылго огыл. Мый тӱҥ рольым модынам. Репетиций годым мый кугу отвественностьым шижынам. Тиде спектакльлан кӧра сар нерген шуко ум пален налынам.
Кира АХМЕТШИНА, «Поезд» эпизодышто модшо:
– Мый Германийыш поктен колтымо йоча-влак нерген каласкаленам. Репетиций годым шучкын чучын огыл, спектакльым ончыктымо кечын рольым модаш йӧсырак лийын. Тыгай шучко жап нигунам ынже тол.
