Игече леве шогымылан кӧра вӱд ӱмбалысе ий кажне кечын гаяк вичкыжемеш. Тидлан кӧра ятыр туткар лийын кертеш. Россий МЧС-ын Марий Эл Республикысе тӱҥ управленийжын Йошкар-Оласе отделенийын ГИМС (Государственная инспекция по маломерным судам) рӱдерын инспекторжо В.С.СТРЕЛЬЧУК (снимкыште) дене ий ӱмбалне шкем кузе кучымо шотышто мутланышна.
– Виктор Сергеевич, шошым вӱд туткарыш логалаш огыл манын, мом шотыш налман?
– Шошымсо ий шыжымсе да телымсе деч ойыртемалтеш. Тошкалмеке, шыжым шелеш гын, шошым иканаште пуреҥгаяш лиеш. Садлан, эҥерын, ерын, пӱян ташлаш тӱҥалмекышт, ий ӱмбаке йӧршын лекман огыл. Ий тарваныме годым эҥер гоч вончаш, сӱмырлен кертше серыште, изи кӱварыште тӱшкан шогаш огеш лий. Ийын кӱжгытшым тӧрштылын тергыман огыл.
– Вӱдыш вучыдымын пуреҥгает гын, мом ыштыман?
– ӧрткыман, утыждене тарванылман, кугун шӱлыман огыл. Кидым кок могырышко шарен, ийышке кержалтман. Ий тӱрышкӧ эплын вочман, мӱшкыр дене нушкын, йо-лым вӱд гыч нӧлталаш тыршыман. Ий ӱмбаке лектын кертмеке, толмо корно дене сер дек эркын нушман.
– Вӱдышкӧ пуреҥгайышым шекланымеке, могай полышым пуыман?
– Кужу тоям, варам, оҥам але кандырам муман. Уке гын, шарфым, кӱзанӱштым, вургемым вашла кылдыман. Пуреҥгайышылан полшаш мийыме нерген кугу йӱкын увертарыман. Тиде тудлан вийым да ӱшаным ешара. Утараш келыштарыме арверым але вургемым шуялтыман, но лишке мийыман огыл. Азапыш логалшым вӱд гыч лукмеке, шокшо верыш наҥгайыман. Ночко вургемжым кудашын, кидым спирт дене нӧртен, капым йошкаргымешке туржман. Вара шокшо чайым йӱктыман. Йоча-влак, пуреҥгайышым ужыда гын, жапым шуйкалыде, 112 номер дене йыҥгыртыза.
