Башкортостан Республик Бирск район Курмызак школын 2-шо классыштыже моткоч чолга, весела ӱдыр тунемеш. Палыме лийнеда? Тиде Вероника Байрамова (снимкыште). Тудо изинек дисциплинылан тунемше, кажне кечыжым шагат еда радамлыме. Дневникыштыже – «нылытан» ден «визытан» отметке-влак веле. Вероника тале спортсменке лийнеже. Сандене спортлан утларак жапым ойыра. Телым ече дене коштеш, кеҥежым куржталеш, волейбол да баскетбол дене модеш. Ролик ӱмбаке шогалеш гын, тудым нигӧ поктен огеш шу.
– Ешыште куд икшыве улына. Чыланат спорт дене кылым кучена. Мый тӱрлӧ таҥасымаште вий-куатем тергем. Медаль ден чапкагазем ятыр улыт. Шукерте огыл ӱстембал теннис дене модаш тунемынам. Лишыл жапыште у сеҥымашыш шуаш шонем, – ойла Вероника.
