Йошкар-Оласе Бауман лицейыште 10-шо класслаште тунемше-влак (снимкыште) Беларусь Республикыш экскурсий дене миенна. Тиде эл Кугу Ачамланде сарын эртыме корныжым поснак чот жапла.
Путешествий Беларусьын рӱдолаж гыч тӱҥалын. Минскыште ме «Остров мужества и скорби» мемориал комплексыште лийынна. Вара корнына Хатыньыш шуйнен. Тиде верым ласкан ончаш ок лий: шинчавӱд шке йога, логарыш комыля кӱза. Мыняр ойгым шучко сар конден! 1943 ий 22 мартыште карательный отряд ялым йыр авырен. Ӱдырамаш, йоча, шоҥгыеҥ-влакым левашыш петыреныт да йӱлатеныт. Кызыт ял олмышто чаҥан 27 бетон меҥге шога. Чаҥ йӱк, сарын шучкылыкшым шарныктен, кажне 27 секунд гыч йоҥга. Колышо эргыжым кидышкыже налше ачан фигурыжым Хатынь покшеке шогалтыме. Тиде Иосиф Каменскийым ушештара. Тудо да икмыняр йоча илыше кодыныт…
Экскурсий Брестыште мучашлалтын. Брест орышто лийынна. «Я умираю, но не сдаюсь. Прощай, Родина. 20.VII.41» – палыдыме салтакын тыге серен кодымыжым лудмеке умылет: кугезе коча-кована-влак пытартыш шӱлыш марте тыныс илышым араленыт. Самырык тукым канде кава йымалне илыже манын, шкеныштым чаманен огытыл. Шарнена тендам, аралышына-влак! Жаплена! Кугешнена!
Юлиана КУРОЧКИНА.
Йошкар-Ола, Бауман лицей.
Авторын фотожо-влак.
