Чевер кече чолга шинчаж дене ужар мландым раш онча. Уремыште, олыкышто, мардеж логалдыме верыште лӱп-лӱп шокшын чучеш, ласкан шӱлалташ юж ок сите. Ала-кушеч чодыра велым толын лекше умыр мардеж, выж-ж-ж пуалын, капкыллан куштылгылыкым ышта, чоным куандара.
Кеҥеж. Шудо солымо жап толын шуо. Авай эрдене котомкашке кочкышым оптыш. Изай дене коктын савам ачалкалаш пижна. Изайлан шонымем луктын каласышым:
– Айда пеленна палаткым налына. Мӧҥгӧ огына тол. Эр юалге дене кугу кумдыкым солен кертына.
Тудат оем дене келшыш.
Шудым ямдылаш чодыра велыш ошкыл колтышна. Авай, «Юмо дене пырля коштса» манын, сугыньым пуэн колтыш. Олык марте вич километрым ошкылман.
Солышаш кумдык кугу. Ужар посто гай олык мучко южо вере, нарынче лаштыкын койын, семыкшудо пеледеш. Мардеж почеш толшо тутло олык саска пуш нерым шыман чыгылтара. Мотор кеҥеж пӱртӱсым каласен моштыдымын сӧрастара.
Кечыгут паша пеш сай ушныш. Вуй ӱмбалне ик пыл лапчыкат ок кой. Тыртыш мелна гый кечыже шокшын ырыкта. Пашана умбакыже шуйна. Кече чодыра вуеш чеверген шинчеш. Кас юалге юж, куэр йымач лектын, йыр шарла. Йырваш тымык. Шудо коклаште кас румбык дене изи карш шке вержым моктен мура.
Кас кочкышым авызлаш шична. Кечыгут шудым солымеке, тул воктене каналташ могай сай. Вий койын пыта. Изай дене коктын палаткыш пурен вочна. Йӱдым ала-могай йӱкйӱан шокташ тӱҥале. Трукышто шинчам почым, тарванашат лӱдынам. Изайым тӱкалтем.
– Палатке воктене ала-кӧ коштеш, колышт, – манам.
– Чот ярненатат, пылышетлан шокта, – пелештыш тудо да савырнен возо. Мыят угыч мален колтышым. Тамле омо пызырале.
Эр. Йӱштӧ юж могырым сӱсандара. Кынелна. Ончена, чынжымак, палатке йырым-йыр ала-мо коштын. Кышажым шымлен налмеке палышна: маска. Кумдыкым йыр шерын лектын: тул олмышто ломыжым пургедын, котелокышто вӱдым сӱмырен, палатке йыр коштын савырнен. Но мемнам тарваташ тоштын огыл. Корныш лекме деч ончыч авай Юмылан пелештен. Очыни, тудо аралтыш лийын. Тугеже мыланна поро пашам шукырак ыштыман.
Серафима ТИМОФЕЕВА.
Морко, Нурӱмбал.
Нейросеть полшымо дене ыштыме сӱрет.
